真情的少女
《真情的少女》Tsin-tsîng ê Siàu-lú
青青Tshing-tshing
——————————————
昨暝的月娘真圓
tsa-mî ê ge̍h-niû tsin înn
咱坐在湖邊
lán tsē tsāi ôo-pinn
談情愛真正投機
tâm-tsîng-ài tsin-tsiànn tâu-ki
兩人笑微微
nn̄g-lâng tshiò bî-bî
月光光有做證據
ge̍h kng-kng ū tsuè tsìng-kì
看見咱情綿綿
khuànn-kìnn lán tsîng mî-mî
阮心內暗暗歡喜
gún sim-lāi àm-àm huann-hí
一切寄託你
it-tshè kià-thok lí
希望你惜花枝
hi-bāng lí sioh hue-ki
終生倚靠你
tsiong-sing uá-khò lí
盈暗的風冷吱吱
îng-àm ê hong líng-ki-ki
單獨在湖邊
tan-to̍k tsāi ôo-pinn
湖水是冷爍爍
ôo-tsuí sī líng sih-sih
予阮心稀微
hōo gún sim hi-bî
你親像天頂流星
lí tshin-tshiūnn thinn-tíng liû-tshinn
忽然間消失去
hut-jiân-kan siau-sit–khì
叫阮欲佗位揣你
kiò gún beh tó-uī tshuē lí
約束的代誌
iok-sok ê tāi-tsì
當做是咧夢見
tòng-tsuè sī teh bāng-kìnn
傷心怨規暝
siong-sim uàn kui-mî
雖然你對阮無意
sui-jiân lí tuì gún bô-ì
阮毋敢無義
gún m̄-kánn bô-gī
每暗又徘徊湖邊
muí-àm iū pâi-huê ôo-pinn
期待重見你
kî-thāi tiông-kiàn lí
但是你一去數年
tān-sī lí it-khì sòo-nî
阮已經有決意
gún í-king ū kuat-ì
生佮死本是由天
sinn kah sí pún sī iû thinn
何必閣傷悲
hô-pit koh siong-pi
黃泉路再相見
hông-tsuân-lōo tsài sio-kìnn
後世結連理
āu-sè kiat-liân-lí
