拳頭師阿西
《拳頭師阿西》Kûn-thâu-sai A-se
金飛Kim-hui(林錦堂Lîm Kím-tông)
——————————————
將性命寄在舞臺
tsiong sìnn-miā kià tsāi bú-tâi
表演拳頭的技藝
piáu-ián kûn-thâu ê ki-gē
全精神追求
tsuân-tsing-sîn tui-kiû
美妙拳頭的架勢
bí-miāu kûn-thâu ê kè-sè
無要求將著技藝
bô iau-kiû tsiong tio̍h ki-gē
當做一種的買賣
tòng-tsuè tsi̍t-tsióng ê bé-bē
也無希望啥代價
iā bô hi-bāng siánn tāi-kè
一心只期待
tsi̍t-sim tsí kî-thāi
排出拳頭的戲題
pâi-tshut kûn-thâu ê hì-tê
有真濟人客
ū tsin tsē lâng-kheh
有時陣踮在烏暗
ū-sî-tsūn tiàm-tsāi oo-àm
稀微冷淡的小巷
hi-bî líng-tām ê sió-hāng
孤一个比跤比手
koo tsi̍t-ê pí-kha pí-tshiú
鍛練著身體
tuàn-liān tio̍h sin-thé
身軀邊美麗愛人
sin-khu-pinn bí-lē ài-jîn
一日一日消瘦去
tsi̍t-ji̍t-tsi̍t-ji̍t siau-sán–khì
心內也是無操煩
sim-lāi iā-sī bô tshau-huân
一心只寄望
tsi̍t-sim tsí kià-bāng
排出拳頭的戲題
pâi-tshut kûn-thâu ê hì-tê
人客會圓滿
lâng-kheh ē uân-buán
有時陣提著物件
ū-sî-tsūn the̍h-tio̍h mi̍h-kiānn
笑容行入當店內
tshiò-iông kiânn-ji̍p tǹg-tiàm lāi
猶原也是袂歹勢
iu-guân iā-sī buē pháinn-sè
也袂驚人知
iā buē kiann lâng tsai
任何人恥笑伊是
jīm-hô lâng thí-tshiò i sī
世間第一戇大呆
sè-kan tē-it gōng-tuā-tai
也袂致意在心內
iā buē tì-ì tsāi sim-lāi
專心只期待
tsuan-sim tsí kî-thāi
一生藝術的性命
it-sing gē-su̍t ê sìnn-miā
響動傳後代
hiáng-tōng thuân hiō-tāi
