遊戲王
《遊戲王》Iû-hì-ông
柏慎Pik-sīn
——————————————
難道是我的頭殼楞
lân-tō sī guá ê thâu-khak gông
怎會看著兩个你
tsuánn ē khuànn-tio̍h nn̄g-ê lí
你的袚鍊金爍爍
lí ê phua̍h-liān kim-sih-sih
有物件佇你頭殼頂
ū mi̍h-kiānn tī lí thâu-khak-tíng
天頂哪會暗暝摸
thinn-tíng ná ē àm-mî-bong
無落雨煞霆雷公
bô lo̍h-hōo suah tân-luî-kong
目睭是糊著啥物
ba̍k-tsiu sī kôo tio̍h siánn-mih
十八仔的攤位敢有
si̍p-pat-á ê thuann-uī kám ū
看我下跤噴出啥物
khuànn guá ē-kha phùn-tshut siánn-mih
予你絕頂升天唷
hōo lí tsua̍t-tíng sing-thian–iooh
青眼白龍拍三千
tshing-gán pe̍h-liông phah sann-tshing
這張才兩千五百
tsit tiunn tsiah nn̄g-tshing gōo-pah
是欲按怎比
sī beh án-tsuánn pí
只好落人囉
tsí-hó làu-lâng–looh
我可愛的女朋友
guá khó-ài ê lú-pîng-iú
我的同學阮阿公
guá ê tông-o̍h gún a-kong
穿白衫的人
tshīng pe̍h-sann ê lâng
攏是我的阿姨阿伯
lóng-sī guá ê a-î a-peh
莫笑我矮仔冬瓜
mài tshiò guá é-á-tang-kue
頂世人我恁頭家
tíng-sì-lâng guá lín thâu-ke
你敢會記
lí kánn ē-kì
毋通數想我的物
m̄-thang siàu-siūnn guá ê mi̍h
你偷提嘛無路用
lí thau-the̍h mā bô-lōo-iōng
等我的褲穿予好
tán guá ê khòo tshīng hōo hó
你就知我的厲害
lí tō tsai guá ê lī-hāi
恁爸從來毋捌輸
lín-pē tsiông-lâi m̄-bat su
感謝逐家對我的愛
kám-siā ta̍k-ke tuì guá ê ài
