春滿愛河
《春滿愛河》Tshun Buán Ài-hô
張淑美Tiunn Siok-bí
——————————————
天清清無烏雲
thinn tshing-tshing bô oo-hûn
風光美麗笑文文
hong-kong bí-lē tshiò bûn-bûn
愛河春風吹著咱青春
ài-hô tshun-hong tshue tio̍h lán tshing-tshun
青春雙人好情份
tshing-tshun siang-lâng hó tsîng-hūn
心情已經得意身難分
sim-tsîng í-king tik-ì sin lân hun
春風吹樹搖動
tshun-hong tshue tshiū iô-tāng
河邊一對有情人
hô-pinn tsi̍t-tuì ū-tsîng-lâng
甜甜蜜蜜快樂真跳弄
tinn-tinn-bi̍t-bi̍t khuài-lo̍k tsin thiàu-lāng
談心談愛心歡喜
tâm-sim tâm-ài sim huann-hí
情意合美滿青春夢
tsîng-ì ha̍p bí-muá tshing-tshun bāng
景色媠真清幽
kíng-sik suí tsin tshing-iu
解人心內的憂愁
kái lâng sim-lāi ê iu-tshiû
青春雙人結成好鴛鴦
tshing-tshun siang-lâng kiat-sîng hó uan-iunn
歡歡喜喜心無憂
huann-huann-hí-hí sim bô-iu
相親相愛逍遙真自由
siong-tshin siong-ài siau-iâu tsin tsū-iû
熱情花當咧媠
jia̍t-tsîng hue tng-teh suí
春滿愛河迷人醉
tshun buán Ài-hô bê-lâng tsuì
佮君遊玩心情生相隨
kah kun iû-uán sim-tsîng sinn siong-suî
阮的情花也青翠
gún ê tsîng-hue iā tshinn-tshuì
甘願永遠為君放心開
kam-guān íng-uán uī kun hòng-sim khui
