著金坑
《著金坑》Tio̍h Kim-khinn
高閑至 Ko Hân-tsì
——————————————
一時著金一時興
tsi̍t-sî tio̍h-kim tsi̍t-sî hing
低厝仔改樓改人生
kē-tshù-á kái lâu kái jîn-sing
遠親近戚陣陣來
uán-tshin kīn-tshik tīn-tīn lâi
酒友筊跤規厝間
tsiú-iú kiáu-kha kui-tshù-king
細姨一个一个揀
suè-î tsi̍t-ê tsi̍t-ê kíng
墨賊仔十八仔跋袂停
ba̍k-tsa̍t-á si̍p-pat-á pua̍h buē thîng
日日夜夜狂狂滾
ji̍t-ji̍t-iā-iā kông-kông kún
西皮福祿看不平
se-phî hok-lo̍k khàn put phîng
烏薰害人比虎猛
oo-hun hāi lâng pí hóo bíng
明知牽拖斷袂清
bîng-tsai khan-thua tn̄g buē tshing
一時得意財酒色
tsi̍t-sî tik-ì tsâi tsiú-sik
享受過頭是不幸
hiáng-siū kuè-thâu sī put-hīng
天不再佑人不敬
thinn put-tsài iū jîn put kìng
浮雲飄過復平靜
phû-hûn phiau kuè hōo pîng-tsīng
世事無常錢財去
sè-sū bû-siông tsînn-tsâi khì
家敗人散悲哀情
ka pāi jîn sàn pi-ai tsîng
