愛河相思曲
《愛河相思曲》Ài-hô Siunn-si Khik
紀露霞Kí Lōo-hâ
——————————————
彼一時咱兩人
hit-tsi̍t-sî lán nn̄g-lâng
行到愛河的岸邊
kiânn kàu Ài-hô ê huānn-pinn
看水面
khuànn tsuí-bīn
無言無語
bô giân bô gú
哭別離
khàu pia̍t-lī
若想起彼个時陣
nā siūnn-khí hit ê sî-tsūn
想起彼个景情
siūnn-khí hit ê kíng-tsîng
燈影照落水面
ting-iánn tsiò lo̍h tsuí-bīn
予阮苦傷悲
hōo gún khóo siong-pi
↓↓—(口白)—↓↓
啊~若想起彼一年
ah~ nā siūnn-khí hit tsi̍t-nî
已經是三年前的代誌囉
í-king sī sann-nî tsîng ê tāi-tsì–looh
當時你已經二十歲
tang-sî lí í-king jī-tsa̍p hè
我也已經十七
guá iā í-king tsa̍p-tshit
我每下晡若下班的時陣
guá muí ē-poo nā hā-pan ê sî-tsūn
你就徛在橋頂等候我
lí tiō khiā tsāi kiô-tíng tán-hāu guá
雙人散步
siang-lâng sàn-pōo
佇風光明媚的愛河邊
tī hong-kong-bîng-bī ê Ài-hô-pinn
那行那笑的形影
ná kiânn ná tshiò ê hîng-iánn
照落水面
tsiò lo̍h tsuí-bīn
啊~彼時陣
ah~ hit sî-tsūn
敢毋是真快樂的初戀咧?
kám m̄-sī tsin khuài-lo̍k ê tshoo-luân–leh?
↑↑—(口白)—↑↑
自彼時拆分開
tsū hit-sî thiah hun-khui
無批無信到這陣
bô phue bô sìn kàu tsit-tsūn
春天去
tshun-thinn khì
秋天閣來
tshiu-thinn koh lâi
已三年
í sann-nî
若想起彼个時陣
nā siūnn-khí hit ê sî-tsūn
想起彼个景情
siūnn-khí hit ê kíng-tsîng
暗淡的月光暝
àm-tām ê ge̍h-kng-mî
引阮流珠淚
ín gún lâu tsu-luī
↓↓—(口白)—↓↓
無偌久我因為環境來所逼
bô guā-kú guá in-uī khuân-kíng lâi sóo pik
去做著一个風塵女性
khì tsò tio̍h tsi̍t-ê hong-tîn lú-sìng
自從彼陣
tsū-tsiông hit-tsūn
你毋閣去橋頂等候我
lí m̄ koh khì kiô-tíng tán-hāu guá
也毋願佇啥物所在
iā m̄-guān tī siánn-mih sóo-tsāi
見我一面
kìnn guá tsi̍t-bīn
不過阮是猶原
put-kò gún sī iu-guân
真思念你
tsin su-liām lí
予我若是每次行到
hōo guá nā-sī muí-tshù kiânn kàu
這條懷念的愛河的時陣
tsit tiâu huâi-liām ê Ài-hô ê sî-tsūn
我我就流著懷念
guá guá tiō lâu tio̍h huâi-liām
悲傷的目屎
pi-siong ê ba̍k-sái
↑↑—(口白)—↑↑
看白鷺成雙對
khuànn pe̍h-lōo sîng siang-tuì
自由自在飛在天
tsū-iû tsū-tsāi pe tsāi thinn
怎樣阮
tsuánn-iūnn gún
孤單一人在河墘
koo-tuann tsi̍t-lâng tsāi hô-kînn
若是會佮你相會
nā-sī ē kah lí siong-huē
我也毋再悲傷
guá iā m̄-tsài pi-siong
希望著有一日
hi-bāng tio̍h ū-tsi̍t-ji̍t
會得再相會
ē-tit tsài siong-huē
