四句聯
《四句聯》Sì-kù-liân
阿錡A-kî
——————————————
上有學問四句聯
siāng ū ha̍k-būn sì-kù-liân
七字好話咱來練
tshit-jī hó-uē lán lâi liān
好話祝福好姻緣
hó-uē tsiok-hok hó in-iân
新娘生媠囝婿嫣
sin-niû senn suí kiánn-sài ian
吉日良時結親情
kiat-ji̍t liông-sî kiat tshin-tsiânn
兩府合婚咱總請
lióng-hú ha̍p-hun lán tsóng tshiánn
新郎生好坐正正
sin-lông senn hó tsē tsiànn-tsiànn
新娘連鞭做阿娘
sin-niû liâm-mi tsuè a-niâ
↓↓—(口白)—↓↓
今咱酒杯共捀懸懸
tann lán tsiú-pue kā phâng kuân-kuân
予新娘生立法委員
hōo sin-niû senn li̍p-huat-uí-uân
喜酒千杯共啉予焦
hí-tsiú tshian-pue kā lim hōo ta
通予新郎早做阿爸
thang hōo sin-lông tsá tsuè a-pah
↑↑—(口白)—↑↑
第一歡喜新親家
tē-it huann-hí sin tshin-ke
一爿娶某一爿嫁
tsi̍t-pîng tshuā-bóo tsi̍t-pîng kè
至親好友來做客
tsì-tshin hó-iú lâi tsuè-kheh
捀杯祝福咱逐家
phâng pue tsiok-hok lán ta̍k-ke
新婚好話繼續講
sin-hun hó-uē kè-sio̍k kóng
親家趕緊做阿公
tshin-ke kuánn-kín tsuè a-kong
上蓋好漢是新郎
siōng-kài hó-hàn sī sin-lông
欲生雙生有妥當
beh senn siang-senn ū thò-tòng
↓↓—(口白)—↓↓
甜茶甜甜燒酒滇滇
tinn-tê tinn-tinn sio-tsiú tīnn-tīnn
早生貴子做伙過年
tsá sing kuì-tsú tsò-hué kuè-nî
好酒好菜好囝好婿
hó tsiú hó tshài hó-kiánn hó-sài
生囝生孫出好人才
senn-kiánn senn-sun tshut hó jîn-tsâi
↑↑—(口白)—↑↑
金言玉語鬥四句
kim-giân gio̍k-gí tàu sì-kù
好某嫁著好丈夫
hó bóo kè tio̍h hó tiōng-hu
好話欲講猶閣有
hó-uē beh kóng iáu-koh ū
恩恩愛愛長又閣久
un-un-ài-ài tn̂g iū-koh kú
新娘入門日日春
sin-niû ji̍p-mn̂g ji̍t-ji̍t tshun
致蔭囝婿事業順
tì-ìm kiánn-sài sū-gia̍p sūn
祝怹好竹出好筍
tsiok in hó tik tshut hó sún
祝咱逐家好年旬
tsiok lán ta̍k-ke hó nî-sûn
↓↓—(口白)—↓↓
百年好合永浴愛河
pah-nî hó-ha̍p íng io̍k ài-hô
鬥四句聯逐家祝賀
tàu sì-kù-liân ta̍k-ke tsiok-hō
新娘入門招財進寶
sin-niû ji̍p-bûn tsiau-tsâi tsìn-pó
咱啉喜酒上第一好
lán lim hí-tsiú siōng tē-it hó
↑↑—(口白)—↑↑
