愛已過站

《愛已過站》Ài Í Kuè-tsām

邱賢桂Khu Hiân-kuì

——————————————

經過了偌濟春夏秋冬

king-kuè liáu guā-tsuē tshun-hā tshiu-tang

心內對你毋甘放

sim-lāi tuì lí m̄-kam pàng

毋知影如今你是變啥款

m̄ tsai-iánn jû-kim lí sī piàn siánn-khuán

忍受了寒風霜雪凍

jím-siū liáu hân-hong sng-seh tàng

花蕊會閣紅

hue-luí ē koh âng

這場戀夢

tsit tiûnn luân-bāng

敢會變成空

kám ē piàn-sîng khang

燈紅酒綠的吧臺內

ting-âng-tsiú-li̍k ê pa-tâi lāi

毋知影是醉抑心茫

m̄ tsai-iánn sī tsuì ia̍h sim bâng

夢醒酒醒

bāng-tshínn tsiú-tshínn

毋知天昏地暗

m̄-tsai thinn-hun tē-àm

傷心的買醉的人

siong-sim ê bé-tsuì ê lâng

如今行到這个坎站

jû-kim kiânn kàu tsit ê khám-tsām

怪自己無怪別人

kuài tsū-kí bô kuài pa̍t-lâng

為情為愛付出

uī tsîng uī ài hù-tshut

心甘情願

sim kam tsîng guān

咱的愛已經過站

lán ê ài í-king kuè-tsām

將思念掛在心房

tsiong su-liām kuà tsāi sim-pâng

漂流命運

phiau-liû miā-ūn

一生流浪的人

it-sing liû-lōng ê lâng