庄跤囡仔的志氣

《庄跤囡仔的志氣》Tsng-kha-gín-á ê Tsì-khì

王中平Ông Tiong-pîng

——————————————

離開鄉里

lī-khui hiong-lí

來到繁華的都市

lâi-kàu huân-huâ ê too-tshī

人地生疏

lâng-tē tshenn-soo

毋知欲對佗位去

m̄-tsai beh tuì tó-uī khì

欲揣頭路

beh tshuē-thâu-lōo

無遐容易

bô hiah iông-ī

四界流浪

sì-kè liû-lōng

受盡了酸苦味

siū-tsīn liáu sng-khóo-bī

啊~庄跤的人情味

ah~ tsng-kha ê jîn-tsîng-bī

踮佇遮

tiàm-tī tsia

已經揣無伊

í-king tshuē-bô i

阮是歹命的散赤兒

gun sī pháinn-miā ê sàn-tshiah-jî

含著目屎吞落去

kâm tio̍h ba̍k-sái thun–lo̍h-khì

將艱苦當做是食甜

tsiong kan-khóo tòng-tsuè sī tsia̍h tinn

展骨氣

tián kut-khì

行出庄跤囡仔的志氣

kiânn tshut tsng-kha-gín-á ê tsì-khì