番薯仔命

《番薯仔命》Han-tsî á Miā
王中平Ông Tiong-pîng
——————————————
人生這條命
jîn-sing tsit tiâu miā
重重若薄紙
tîng-tîng nā po̍h tsuá
霜風吹來心無倚
sng-hong tshue–lâi sim bô uá
悲歡離合命
pi-huan lî-ha̍p miā
敢有啥人疼
kám ū siánn-lâng thiànn
坎坷路途也著行
khám-khia̍t lōo-tôo iā tio̍h kiânn

毋通笑阮
m̄-thang tshiò gún
是番薯仔命
sī han-tsî-á miā
人生的路途天註定
jîn-sing ê lōo-tôo thinn tsù-tiānn
風雨若過了
hong-hōo nā kuè-liáu
坎坷一切就準煞
khám-khia̍t it-tshè tiō tsún suah

番薯仔毋驚落塗爛
han-tsî-á m̄-kiann lo̍h-thôo nuā
向望枝葉一直湠
ǹg-bāng ki-hio̍h it-ti̍t thuànn
相信天公一定會疼戇囝
siong-sìn thinn-kong it-tīng ē thiànn gōng-kiánn