風雨簫聲
《風雨簫聲》Hong-ú Siau-siann
尤雅Iû Ngá
黃玉玲N̂g Gio̍k-lîng
余文雄Î Bûn-hiông
——————————————
烏暗暗恐怖海邊
oo-àm-àm khióng-pòo hái-pinn
波浪聲連天
pho-lōng siann liân-thinn
暴風雨可怕暗暝
po̍k-hong-ú khó-phà àm-mî
行到海岸邊
kiânn kàu hái-huānn pinn
今日是伊結婚日子
kim-ji̍t sī i kiat-hun ji̍t-tsí
忍不住心傷悲
jím put-tsū sim siong-pi
決意欲離開去
kuat-ì beh lī-khui khì
後世再相見
āu-sì tsài sio-kìnn
↓↓—(口白)—↓↓
小芬小芬小芬
Sió-hun Sió-hun Sió-hun
你哪會走來遮咧
lí ná ē tsáu-lâi tsia–leh
你免管我
lí bián kuán guá
今仔日
kin-á-ji̍t
是你結婚的日子
sī lí kiat-hun ê ji̍t-tsí
你不應該將新娘放咧
lí put ìng-kai tsiong sin-niû pàng–leh
來遮揣我
lâi tsia tshē guá
你緊轉去
lí kín tńg–khì
你緊轉去
lí kín tńg–khì
無感無情無同意的結婚
bô-kám-bô-tsîng bô tông-ì ê kiat-hun
我無承認
guá bô sîng-jīn
我欲佮你做伙
guá beh kah lí tsò-hué
拜託咧
pài-thok–leh
你毋通按呢講
lí m̄-thang án-ne kóng
你若按呢
lí nā án-ne
我的良心會永遠不安
guá ê liông-sim ē íng-uán put-an
我自細漢是無人疼惜的孤女
guá tsū suè-hàn sī bô-lâng thiànn-sioh ê koo-lú
佳哉是你的爸爸媽媽
ka-tsài sī lí ê pá-pah má-mah
共我抾去飼到大漢
kā guá khioh khì tshī kàu tuā-hàn
若親像我再生的爸母
ná-tshin-tshiūnn guá tsài-sinn ê pē-bú
這个恩情
tsit ê un-tsîng
我毋敢放袂記咧
guá m̄-kánn pàng-buē-kì–eh
你趕緊轉去啦
lí kuánn-kín tńg–khì lah
哼!恩情是恩情
hngh! un-tsîng sī un-tsîng
愛情是愛情
ài-tsîng sī ài-tsîng
這根本是兩回事嘛
tse kin-pún sī nn̄g-huê sū–mah
咱兩个互相相愛
lán nn̄g-ê hōo-siong siong-ài
為啥物袂當結婚咧
uī-sí-mih bē-tàng kiat-hun–leh
攏是阮爸母毋允准咱的結婚
lóng-sī gún pē-bú m̄ ún-tsún lán ê kiat-hun
所以我怨恨怹啦
sóo-í guá uàn-hūn in–lah
你哪會講按呢
lí ná ē kóng án-ne
我毋敢怨恨啥物人
guá m̄-kánn uàn-hūn siánn-mih lâng
總講是咱無緣
tsóng-kóng sī lán bô-iân
你毋通閣講紲落去囉
lí m̄-thang koh kóng suà–lo̍h-khì looh
若按呢
nā án-ne
你來遮創啥咧
lí lâi tsia tshòng siánn–leh
我我只有想死
guá, guá tsí-ū siūnn sí
啥物？死？
siánn-mih? sí?
↑↑—(口白)—↑↑
伊對阮雖然有情
i tuì gún sui-jiân ū-tsîng
毋敢來答應
m̄-kánn lâi tah-ìng
波浪聲又叫無停
pho-lōng siann iū kiò bô thîng
心內真分明
sim-lāi tsin hun-bîng
若親像替阮抱不平
ná-tshin-tshiūnn thuè gún phāu-put-phîng
總講為報恩情
tsóng-kóng uī pò un-tsîng
才著愛來犧牲
tsiah tio̍h-ài lâi hi-sing
決心了殘生
kuat-sim liáu tsân-sing
↓↓—(口白)—↓↓
小芬你既然想死
Sió-hun lí kì-jiân siūnn sí
我也欲佮你鬥陣死
guá iā beh kah lí tàu-tīn sí
欸!袂用得
eh! buē-īng-lit
你有家庭
lí ū ka-tîng
你有爸母
lí ū pē-bú
厝內猶閣有
tshù-lāi iáu-koh ū
一个太太咧等你
tsi̍t-ê thài-thài teh tán lí
我毋管啦
guá m̄-kuán–lah
我無答應
guá bô tah-ìng
我無佮意的婚姻
guá bô kah-ì ê hun-in
我我無愛啦
guá, guá bô-ài–lah
你若按呢做
lí nā án-ne tsò
我豈毋是變成一个
guá khí m̄-sī piàn-sîng tsi̍t-ê
忘恩背義的人
bōng-un puē-gī ê lâng
你也變成一个不孝子
lí iā piàn-sîng tsi̍t-ê put-hàu-tsú
是
sī
我願意做一个不孝子
guá guān-ì tsò tsi̍t-ê put-hàu-tsú
爸爸媽媽我真不孝
pá-pah má-mah guá tsin put-hàu
但是這也攏是恁做得來的
tān-sī tse iā lóng sī lín tsò-tit-lâi–ê
誰叫恁強迫我娶別人
siáng kiò lín kiông-pik guá tshuā pa̍t-lâng
拆散阮的情愛
thiah-suànn gún ê tsîng-ài
恁毋通完全怪我
lín m̄-thang uân-tsuân kuài guá
怪恁自己太過固執好啦
kuài lín tsū-kí thài-kuè kòo-tsip hó–lah
真情真愛
tsin-tsîng tsin-ài
一對可憐的好伴侶
tsi̍t tuì khó-liân ê hó phuānn-lī
有堅定意志
ū kian-tīng ì-tsì
雖然在生
sui-jiân tsāi-senn
毋是同月同日生
m̄-sī tông-gue̍h tông-ji̍t senn
但願同日死
tān-guān tông-ji̍t sí
永遠兩相依
íng-uán lióng-siong-i
愛情永不移
ài-tsîng íng put-î
雙雙對對伴相隨
siang-siang tuì-tuì phuānn-sio-suî
天上結情義
thian-siōng kiat tsîng-gī
小芬
Sió-hun
我遮有一條皮帶
guá tsia ū tsi̍t tiâu phuê-tuà
咱兩个縛做伙
lán nn̄g-ê pa̍k tsò-hué
雖然在生袂當做堆
sui-jiân tsāi-senn bē-tàng tsò-tui
死也甘願伴相隨
sí iā kam-guān phuānn-sio-suî
↑↑—(口白)—↑↑
風蕭蕭
hong siau-siau
雨也飄飄
ú iā phiau-phiau
真情斷不了
tsin-tsîng tuān put-liáu
真感情才最重要
tsin kám-tsîng tsiah tsuè tiōng-iàu
啥人都明瞭
siánn-lâng to bîng-liâu
在生難得共度春宵
tsāi-sinn lân-tit kiōng-tōo tshun-siau
在天是真逍遙
tsāi thinn sī tsin siau-iâu
有兩條神魂飄渺
ū nn̄g-tiâu sîn-hûn phiau-biáu
同唱安魂調
tông-tshiùnn an-hûn-tiāu
