風颱天
有一工天頂的烏雲佮白雲戰來戰去，親像史艷文大戰藏鏡人，烏雲閣叫出伊的秘密武器，著是伊的好兄弟風仔，共白雲趕甲無看雲影，這時烏雲聯合風仔，共地球有的厝吹甲東倒西歪，另外烏雲的後生雨仔麻親像去倒水仝款，予足濟所在攏山崩水流，地球上敢若經過一場戰爭仝款，相信逐家一定攏有印象，這著是你我攏愛面對的風颱天。
有一年有一工暗時仔，放學時看著天頂的雲攏變紅矣，我著三步做二步敢若痟狗爭墓壙仝款大划走轉厝問阮阿媽:「為啥物雲攏變紅矣？」我阿媽著笑笑講:「講甲予你捌，喙鬚予拍結，風颱欲來耶，老師敢無共你講?」我著應講:「有矣!有矣!老師講叫我今仔日看新聞，看明仔載咱宜蘭敢歇睏一工。」阿媽紲落來講:「天頂若起雲尪，大雨著會落」你看今仔日雲走甲遮爾緊，我看風颱連鞭著到矣!我欲來去準備一寡物件，無風颱來若是拄著停電你著會知慘哦，囡仔人先莫吵，若無著共你掠起來硩厝角。
彼工暗時仔，當我看電視看到真精彩時，雨仔開始親像搧喙䫌仝款葩一下落落來，無外久風仔嘛咻咻叫，外口的物件嘛ping ping piang piang飛來飛去，毋知去挵著啥物，這時電視畫面跳一下跳一下，電火嘛化一个化一个，我趕緊共電視關掉，厝內底有人大聲喝一聲:「停電矣!」叫我趕緊去點蠟燭，因為傷過暗看無路，我著佮 我阿弟仔相撞，實在有夠衰!這時外口風雨越來愈大，雨水麻一直潑入來，厝內的門強欲予風搧開，這時看著阿媽雙手合掌大聲喝講：「土地公土地婆，媽姐婆觀世音菩薩，做好心的趕緊共風颱趕走啦」但是風雨嘛是越來越大，佇無電的風颱暝，全家伙子上大的期待著是風颱趕緊走，希望白雲會使閣戰贏烏雲，天光閣會使閣再看著溫暖的太陽。
隔轉工透早聽著tsiu tse仔塊哮，我著知影風颱過去矣，早頓猶未食我著趕緊拍開電視，看到底有發生啥物代誌，這時電視底新聞報出有的所在淹大水有的所在有土石流，一寡人去予土石流硩死，害我心肝頭一陣酸痛，希望台灣這塊土地以後會平平安安度過每一擺考驗。風颱雖然是你我一世人攏愛去面對的挑戰，我相信只要逐家有萬全的準備，一定會平安度過每一擺的考驗，著親像咱人仝款愛面對無仝款的挑戰，你講是毋是?