百家姓臺語音臺語姓氏讀音

頂一篇講著孫立人將軍，我佇facebook寫了，受著一寡台語文界个老師友志个反對，怹講無同意、無聽過名姓个「孫」是唸做 Sng 个音。所以，關係「孫立人」台語唸做 Sng Li̍p-jîn 我愛做一个補充。

台語「囝孫」个「孫」–字，講 sun，無問題。「囝孫」雖是白話，但是其中个「孫」唸做 sun，音韻系統屬佇「字音」、亦著是文言音、讀音。

若當做儂姓用，姓「孫」个台語名，台灣儂上捷聽著个，我相信是「孫悟空」。即个「孫悟空」是古冊个人物，所以做戲个、講古个，怹選擇唸文言音 Sun Ngōo-khong，後來民間閣走音變成 Sun Mōo-khong.

但是一般儂个姓「孫」–字，著愛唸白話音 Sng，這是泉州、廈門腔，若漳州腔是 Suinn。亦著是親像「酸」白話音个泉漳腔口分別按呢。

姓「孫」唸做 Sng，無論廈英大辭典(1873)、廈門音新字典(1913)、台日大辭典(1931)，每一代經典性个閩台語字辭典攏有明文記載。

閣卡重要个，是 Sng Li̍p-jîn 即三字，是當年阮老父閣佇咧个時，親喙對我所講，我印象足深，記甲一清二楚。

一代傳一代个台語到我遮，我綴阮老父繼續講 Sng Li̍p-jîn 到底有啥毋著？咱欲爭取、欲傳承个，咁毋是父母話？

亦真佳哉，當年我主動請阮爸爸共我講伊少年个代誌，我才有機會聽著伊講著即个名。若無，今仔日我佇遮按呢主張，無一儂同意，我煞千喙僫分[tshing-tshuì oh hun]。

我當然知影，現今多數台灣儂，攏已經毋知影「孫」遮爾簡單个字「竟然」有 Sng 个音。影響个因素有三點，我頂面講著兩點：1.囝孫 2.孫悟空，第三點著是 sun 卡倚華語音。

我毋是破袂開个蠻柴頭，堅持 Sng 才是姓「孫」个正音，逐家欲唸文言音 Sun，我無反對。但是請千萬毋通攏無稽考[khe-khó]過，煞來否定儂繼續講 Sng 个音。

整體來講，台語个字姓有對白話音改讀文言音个趨勢：親像「翁 ang、何 uâ、史 sái」變做 ong、hô、sú，從中尤其是「史 sái」因為佮「屎」共音，所以變了上早。甚至傳統布戲都[to]有用這來滾耍笑。

姓「史」連傳統布袋戲都攏唸 Sú 矣，所以金光電視布袋戲當然是講 Sú iām-bûn（史豔文）。

台語个豐沛十全[phong-phài tsa̍p-tsn̂g]、千變萬化，毋是咱即代个儂所想个遐爾簡單。

汝咱台語程度䆀 [Lí-lán Tâi-gí thîng-tōo bái]
䆀甲離經閣毋知 [Bái kah lī-king koh m̄ tsai]
無緊扑救穩當害 [Bô kín phah-kiù ún-tàng hāi]
老師學生同齊來 [Lāu-su ha̍k-sing tâng-tsê lâi]