吸毒搖頭毋通摸

吸毒搖頭毋通摸，

沐著牢著塗塗塗，

身敗名裂叫艱苦，

某囝歹顧面反烏。

毋通加入烏社會，

酒色毒筊逐項衰，

欺壓善良保護稅，

冤家相刣性命賠。 

老大喝拍只有綴，

好運逃脫這一回，

毋敢加講一句話，

隨時驚惶頭垂垂。卜卦調

少年囂俳老狼狽，

背後呸瀾看笑詼，

蹽落江湖想後悔，

身不由己心肝挖。

歹事做盡閣犯罪，

失魂落魄覕佗飛，

無奈烏暗一生過，

爸母卸死面體皮。 

千萬毋通愛啉酒，

啉酒開車性命休，

害慘別人真夭壽，

害人害己予人憂愁。

駛車守法愛小心，

互相相讓著愛忍，

燒酒千萬毋通啉，

若無一定會相唚。 

社會勞動有創意，

改過自新愛保持，

充滿希望重開始，

性命溫暖笑微微。

~~知錯能改~~

鴨卵較密嘛有縫，

若是煏空怎見人，

過久僫改真歹紡，

搬山坉海了戇工。

紙袂包火人毋肯，

攑頭三尺有神明，

欺騙一時有報應，

老實有底過一生。

仙人拍鼓有時錯，

跤步踏差啥人無，

改過自新自然好， 

知影隨改眾人褒。

做了毋著愛隨改，

變臉受氣加悲哀，

趕緊改過就會使，

逐工快樂笑咍咍。