序言
路無行，呣知偌遠
我是曾骨蕭皮，自細漢就定定聽著厝邊頭尾講：「生的，撥一邊；養的，功勞較大天。」後來佇教會聽牧師講道，嘛常在聽著牧師講著臺灣話的俗諺，親像講啥麼「鼻空向落，無一個好人。」、「較食人，鼻空也是空殼。」較大漢的時就共所聽過的臺灣話俗諺記落來，愈記愈濟。二十外歲仔開始教冊的時，若看著俗諺的冊就共買落來，愈看愈感覺寶貴。呣佫目睭看著的臺灣話俗諺愈來愈濟，耳空聽著的煞愈來愈少，即爾寶貴即爾□的臺灣話俗諺慢慢仔失落去，我則發願卜共所聽著、所看著的臺灣話俗諺整理出來。目一目聶仔，四十外冬就過去矣，臺灣話俗諺永遠收勿會了，年歲也六十外矣，無收煞一下勿會使，自按爾就共請出來佮逐家見面。
通行佇臺灣的臺灣話就親像一條大溪，伊沿路抾古漢語、閩越語、□語、荷蘭語、西班牙語、南島語、客語、梵語、日語、英語、希伯來語、拉丁語、菲律賓語、馬來語、臺北華語等等，愈流愈大條，愈流愈複雜。
目前佇臺灣約佔７３．３％的人口（根據２００９年中華民國年鑑。）所使用的臺灣話，到底有偌濟講法，請看下面的簡表﹕
講法 含意
臺灣話 臺灣閩南人一直自稱自己的語言為「臺灣話（ｔａｉ５ ｕａｎ５ ｕｅ７）」。
臺灣語 日語對於臺灣話的稱呼，常見於日本統治時期文獻。
臺語 戰後臺灣閩南人簡稱為「臺語」。
閩南語 國民政府凡公家指稱臺灣話時一概稱為「閩南語」。
鶴佬語 客家人或廣府人對閩南民族語言的稱呼。
福佬話 客家人稱閩南語為福佬話。
河洛語 １９５５年吳槐發表〈河洛語閩南語中之唐宋故事〉的本字是河洛。
甌駱語 １９８４年許極燉《台灣文藝》９０期提出「甌駱」論。
貉獠語 １９９２洪惟仁《台語文學與台語文字》考證ｈｏｈ８ ｌｏ２的本字是貉獠。
臺閩語 （曹逢甫２０００）。
福臺語 （余伯泉等２００３）。
其實無論啥款的講法，攏有人反對。我主張上濟臺灣人咧講的母語，就是「臺灣話」。「英語」是「英語」，「美語」是「美語」，敢呣是上好的樣式？所以我就共呰部《俗諺語典》號做《臺灣話俗諺語典》（以下簡稱《語典》）。
整理呰１８０３２條的俗諺，上頭疼的是漢字。臺灣話語文脫節已經真久矣，無約定俗成的規範通好照行，教育部《臺灣閩南語常用詞辭典》的用字傷少，無夠用，而且益佫有真濟愛稽考的所在，若是教育部《臺灣閩南語常用詞辭典》的用字免佫稽考的，我就照用。以外就照我所研究的用字來用。佇文字的發展過程中，所有的虛詞用字攏是借來的，用一下久則會定著落來，呰部《語典》的用字，其中益有無確定的借用字，尤其是虛詞、擬聲詞、擬態詞，佫較是按爾。文字攏是綴佇語言的後尾發展，眾人寫、眾人讀、眾人傳，則會定著落來，向望臺灣話語文交予伊的市場來約定。
張屏生教授建議我逐條俗諺攏愛寫例句，人較會曉得運用，呣佫我感覺寫例句愛有適當的情景，則有法度完全表現出俗諺的含意。會記得佇１９８２年嘉義市媽祖婆許世賢博士已經七十五歲，競選縣轄市嘉義市市長，對手是國民黨黨員涂德錡，涂德錡佇政見發表會攻擊許世賢傷老矣，叫選民呣通共選票投予棺材鑽一半的人，許博士的支持者聽一下，想講呰聲去矣。想勿會ㄔ各許博士隨大聲應講：「棺柴貯臭，無貯老。」逐家做伙喊起來，佫大聲扑噗仔，結果七十五歲的許世賢博士當選。頂面所講的例是運用俗諺運用了上□的，這呣是三冬五冬練會起來的。若卜共俗諺寫例句，著愛親像有呰款的情景，呣則會條直，呣佫若按爾寫，字數會相當驚人，我想講呰部冊已經傷重矣，若佫寫例句，煞無人敢出版，後日仔則來寫《一條俗諺，一層故事》來補充，張屏生教授嘛同意。
四十外冬來，沓沓仔收集、整理俗諺，實在是比足百百岳佫較悿，因為俗諺勿會輸一部百科全書咧，牽涉著勿會少的學識，總是一山足百了佫足百一山，翻頭看行過的路，實在有夠遠，實在有夠□啦！我勿會使甕肚，著招臺灣人逗陣來去足百「臺灣話俗諺」呰粒大山。
研究臺灣話語文呰條路有淡薄仔孤單，好佳哉！有緣熟似真濟共途的，特別是張屏生教授佮杜建坊先生。佮人因討論，共人因請教，人因攏盡腹摒予我。張屏生教授送我研究臺灣話語文的專書超過３００本，佫共伊採錄的內埔、永靖、安平、東石、金門、紅毛港、淡水、桃園新屋軍話等等的俗諺攏送我；杜建坊先生真慷慨，共伊所收藏的《廈門指南》（第四篇方言）、《分類注釋閩南諺語選》、《臺灣風物》有關俗諺的部分影印予我。有即濟文獻鬥相楗，我加真在膽。
也真感謝李如龍教授、董忠司教授、張屏生教授無相棄嫌，來寫序文贊聲。李如龍教授建議出版「簡明本」，「簡明本」牽涉著語音的體例，暫時無扑算，後日仔若共標音□掉，就會得通出版「簡明本」；董忠司教授建議加添「分類編號索引」，共冊名改做《臺灣話俗諺大辭典》，後來我共冊名定為《臺灣話俗諺語典》，也共「分類編號索引」寫落去紙本。也感謝董教授推薦呰部《臺灣話俗諺語典》予五南圖書出版公司出版。
特別愛感謝張屏生教授自願做「矮仔毛遂」，共伊重要的穡頭放咧，認真替我校對，伊捌講：「校對就若像掃樹箬仔咧，那掃那落。」佇方言差呰方面，予伊掃一堆樹箬仔，掃了勿會輸予我一粒定心丸咧。我卜共伊說一聲：「擼汝的力嗚！」
呰部《語典》會得通完成，我一定愛感謝我的家後方璧霞，伊支持我研究臺灣話語文。也真感謝自２０００年以來，佇嘉義市社區大學結緣，ㄔ各目前益佫跟我跟牢牢的一陣學員，人因若知影佗位有好的發音人，就報我知，有閒就招招咧相毛…逗陣去採錄，嘛逗做真濟工課。嘛感謝濟濟願意予我田野調查的發音人，若呣是人因逗相共，呰部《語典》就無啥路用。
編者才疏學淺，一枝柱起呣成厝，若無眾人逗相楗，卜那會得通完成？若講完成，是暗時行路──無影啦，一定益有失覺察的所在，世間大理概，是呣？敬請讀者包涵指正。
蕭藤村 謹序於嘉義縣中埔鄉
２０１２年７月
讚 ·
莊文龍 萬分敬佩真感動，台灣驕傲行有風，
奉獻青春大向望，推動台語緊成功。