歡迎收看宜蘭有線第四台：楊文通(台語答喙鼓、台語正字單元)、李仙恩(台語答喙鼓單元)、莊文龍(歡喜相褒學台語單元)主持
=台語補破網=節目每禮拜四、日暗時７點。拜一、五早起九點播出=請批評指教！感謝！
歡喜相褒學台語第二集文字稿 莊文龍紀錄轉寫2012/02/16
李周阿合:
手攑鋤頭利鋸鋸，欲來園仔掘蕃薯，蕃薯實在大粒米，腹肚若枵好安飢。
蕃薯大條好火君湯，龜山對來是海中央。
手攑鋤頭重頭輕，阿哥掘股娘牽藤，下昏欲轉行仝陣，仝腹姊妹仔無遐親。
手攑鋤頭重頭輕，蕃薯加種兩千藤，有蕃薯無米無要緊，蕃薯是阮性命根。
蔥仔韭菜平平薟，豆油魚露平平鹹，阿哥想娘對點點，娘仔想哥海摸針。0421
紅菜煮湯紅和和，翁某冤家無奈何，厝邊頭尾勸咱好，勸咱翁某就合和。
家和萬事成，家吵萬世窮。
芋葉貯水一粒珠，海底船仔半沉浮，實在佮哥無啥事，也有外面喊甲浮。
茶仔那挽那晡枝，阿娘那老那退時，比在早前廿一二，欲唸歌詩免停時。
歲月不留人。
鼠麴開花好做粿，芹菜開花芳小梅，真久無聽君仔話，十分愛睏袂交睡(ka1-tsue7)。
客人城，大楓跤。
這爿望過彼爿湖，看著一片大茶埔，阿娘仔挽茶真辛苦，面肉白白曝甲烏。9:24
挽茶一逝閣一逝，我靠挽茶佇生活，這陵挽好別陵紲，日頭較大毋驚熱。
講著挽茶食袂消，風吹日曝擋袂牢，若欲犒軍無才調，三頓嘛是佇腹肚枵。
歌仔到遮欲捻斷，歌仔屎毋通拖傷長，下昏逐家欲倒轉，轉去逐家就買田園。
馮陳阿珠(美子):
韭菜開花直溜溜，芹菜開花結規虯，少年的唱歌交朋友，老歲仔唱歌是解憂愁。
紅菜煮湯紅和和，爸母拍囝為著哥，烏青激血無當討，予哥僥去無功勞。13:17
芥菜開花黃濫濫，松柏落湖較懸杉，有哥無娘大悽慘，親像孤鳥關落籠。
孤鳥有關是無放，天下悽慘阮一人。14:11
真趣味、真心適。哥仔奅奅矣(–eh)欲轉
欲送哥仔到岩壁，心肝明明仔為哥邪，轉去你的批就來寫，小妹仔定歸你的額。14:47
欲送阿哥仔到門口，雙手袚在哥肩頭，阮今想甲強欲哭，阿君佇欲轉ㄒ因兜。
阮今唱歌人遮濟，娛樂唱歌欲交陪，歌仔到遮欲叉尾，若欲聽歌等後回。15:56
今仔日來遮真歡喜，看著逐家唱歌唱甲真趣味。
馮林阿鈕(阿春姨82歲):
一支甘蔗平平長，毋知佗一支較有湯，兩个阿娘仔平好耍，毋知佗一个較久長。16:46
一模竹子遮大林，取無一支作翹擔，阿母生我查某囝，若是查埔替哥擔。17:10
日頭毋出激烏陰，鴟鴞毋飛激徛愖，人人有哥來致蔭，阮是無哥挽茶心。
挽茶查某上艱苦。
欲挽茶仔仝一部，茶仔挽好轉家和，轉去有人會煩惱，三不五時來迫迌。18:00
兩粒菝仔平平奒，一粒較好先甪臍，較早來好今來䆀，啥人共我拐我嘛知。
韭菜開花一枝香，粗紙落水聊聊仔溶，恁來有歌做恁唱，我是無歌欲收場。18:54
當我們同在一起、在一起、在一起、當我們同在一起。游阿謹(84歲):
歲頭食到八十外，心內想欲來唱歌，親情好友莫笑我，來遮歡喜欲唱歌。19:44
水雞在蹛稻仔內，稻仔弄花驚風颱，外庄阿哥僫款待，款待無好伊毋來。
石頭落水也袂爛，魚仔落水也袂寒，毋捌佮哥仔佇盤撋，毋知哥仔啥款的心肝。
台語削削叫，無學真可惜，專心綴會著，毋驚去予人笑。
相褒歌曲臺灣寶，出喙成歌來相褒，欲揣這款世界無，逐家來學真正好。
台灣國寶:游阿謹(84歲) 馮林阿鈕(阿春姨82歲) 馮陳阿珠(美子76歲) 李周阿合(87歲)。