敢袂醫死人?
連續假期尾工的今仔日透早，熟似的主任好友，有心的老爸，七點就櫓電話。拜託我指導欲考醫學院面試的準醫學生，伊的寶貝仔囝，台語自我紹介詞。非常有一點仔趕緊的臨時報佛跤效果，毋知啥款，阮攏盡全力啊!希望伊有好成績!
遮嘛是我定定共學生提醒的實例之ㄧ，咱的教育單位，應該更加注重母語教育，醫生台語袂曉講，是考袂牢甄選面試。律師、老師、空姐、空中少爺、主持人、頭家、業務員、服務生、主管、等等。每一行業的重要職務、工課，攏愛用著輾轉的母語。等到欲用著，才來學，有一點啊袂赴市!傷慢矣!
毋過像咱馬總統，伊就真好運，台語2266，天公仔囝無差，好命底，人嘛做甲總統。希望恁攏有伊遮好命!
阮查某囝，拄著我這个頇顢老爸，愛靠家己兼差相添學費、所費，我真對不起伊，為著我所愛的興趣，趁無夠家庭開銷，想著就鬱卒!
毋過至少台語較厲害，同齊入去公司的同事，人佇遮寒的冬天，做粗重搬菜、搬雜貨、浸冰凍手的冷水佇洗菜，洗甲真怨嘆。平平是同齊進入公司，阮查某囝台語較厲害淡薄仔，就徛櫃檯服務人客點餐。真無公平?
咱的台語教育，小學才一節，國中、高中斷層，我看台文系的畢業生、研究生，台語猶閣2266。佇遮誠懇呼籲所有的人，好好珍惜母語教育，毋通予2266的醫師，因為聽無台語，誤解醫死人，就害溜溜囉!
嘛請所有的人，咱的主管單位教育部，好好重視正式課程的一節母語課程。是毋是閣較重視，好好完整規劃國中、高中、大學連貫的課程計畫。和媒體的主管NCC合力，對台語用字較用心要求。咱的爸母較早重視母語教育。勞力恁逐家!拜託!