歡喜相褒學台語-龍序
歡喜相褒學台語
宜蘭是歌仔戲的故鄉，歌仔戲是咱台灣的國寶。宜蘭縣長期推動歌仔戲、本土文化的釘根活動，盡心盡力，包含成立宜蘭戲劇舘、蘭陽戲劇團、出版相關的跤步手路套冊、歌仔戲推廣班等等。對全台灣第一開始推行本土語言的縣市，到出版兩套本土語言教材，嘛會當講是本土語言推動的火車母。歌仔戲的推，是宜蘭縣政的重點！傳承佮創新，閣較是雙頭並進，積極落實的首要工作。
七字仔的相褒歌謠，這會當講是臺灣世界級的寶貝，出喙成歌、每句押韻的四句聯仔、應對現場的情景，現場編歌，即時回應、是難度足懸的對唱方式。伊更加是本地歌仔、歌仔戲的前身。這擺莊文龍老師，伊用當地收集的相褒歌仔做基礎，來創作新的七字仔，做為本土語言的補充教材。取材生活化，兼顧趣味性！結合宜蘭在地的傳統特色－歌仔戲，設計課程，用歌仔戲優美的曲調，來配合課文的吟唱，予學生熟似，進一步佮意，更加願意去了解、欣賞佮運用！予台灣的國寶－傳統的歌仔戲，會當繼續流傳。幾落百種的歌仔戲調，若有適合的曲調，攏會當用無仝款的曲來套用，變化教唱，會予無味的重複練習，變甲較趣味。也會使配合各國的歌仔調、世界名曲、囡仔歌、傳統歌謠、藝術歌曲、上新、上現代、上流行的歌曲，提來套曲吟唱方式、參用RAP 的唸法也是學生真歡喜、真佮意的讀法，足濟新奇變化的表現，予推行歌仔戲，看著新的改良佮創新希望！
這本—歡喜相褒學台語，是宜蘭推動歌仔戲教育的新里程。更進一步予台灣文學釘根學校、深耕社區、行向世界！希望建立台灣人對本土文化的信心，佇台灣徛起，展望世界。
一項文化欲發揚光大，必需對細漢開始，深耕培養，宜蘭縣縣政府願意一步一腳印，實驗研究，傳承創新。寄望全國各校親、師、生，亦會當經由這套教材，認識歌仔戲的精髓，共同推動歌仔戲，予伊變成台灣之光，轟動全世界!
歡喜相褒學台語，輕鬆好耍真趣味，
編輯說明來講起，傳教簡單閣順利。
歡喜相褒學台語，提供一年仔到六年仔的國小學生，每學期有六篇補充教材，1-1－1-6是一上；1-7－1-12是一下，按照順序，老師會當看都合，抽選教授，先教學生讀予熟、會曉唸。
閣會當選用總表頂懸所標示的歌曲，用學生熟悉的曲調，套用教唱，所有歌曲只要曲調適合，攏會用哩套用，用RAP的唸法，也是學生真歡喜、真佮意的讀法，會予無味的重複練習，變佮較趣味、較心適。尤其是傳統歌仔戲的優美曲調，也會使透過課文的吟唱，予學生熟似。進一步佮意，更加願意去了解、欣賞，予台灣的國寶－傳統歌仔戲繼續流傳。
更加希望，經由具體的教材，明確教育的方式，予學生會當簡單入門，欣賞歌仔戲的精緻佮幼路，了解伊的氣參趣味，笑詼含優雅，閣較進一步佮意歌仔戲!對伊用熱情，共伊關心、愛護，加共疼惜、加來參與、創作！更加向望予歌仔戲會當傳唱千年佮萬年！
這本冊注音方式，採用台灣羅馬字標注本調，注音符號標注變調後實際唸讀的音，使學生能輕易唸讀，注音符號亦採用樟樹出版社邱文錫老師免費提供的注音軟體，採直式注音符號，佮現行華語注音方式相同，使學生學習台語的困擾減到上少。
七字仔是相當簡捷精練的文字，經由簡單語詞替換訓練，會予囡仔閣較精光、聰明。也因為每句押韻，真好背記，相關語詞，同韻連繫，觸類旁通、舉一反三、融會貫通，運用生活化、趣味化、實用的白話七字仔，套歌嘛予學生仔印象閣較深，記智閣較好。
作者經由自己摸索、請教老師、網路走揣、讀冊，學習試作的文章，無蓋成熟的作品，若有缺點，敬請各位前輩多多指教！嘛希望家長共同關心，督促學生。親師生共同學習、創作、傳承。
相褒歌曲臺灣寶，出喙成歌來相褒，
欲揣這款世界無，逐家來學真正好。
台語芬芳好氣味，巧妙運用激腦智，
轉化美麗歌詩，傳唱千年佮萬年。
莊文龍 敬上2008/12/12