分類：台語
2007/12/17 15:26
台灣話實在真好聽，講–起來若（ná） 咧唱歌。
台灣話有八聲七調，講–出來懸懸低低（kuân-x-kē-x），聽–起來媠（suí）閣自然；佇無仝款的動作，就有無相像（sio siāng）的表情，連聲調嘛著變來變去。用台灣話來請安相借問，上有人情味，一聲「 gâu 早）！」、「食飽–未？」共（kā）逐（ta̍k）家的感情攏連結做夥，厝邊隔壁無論阿伯、阿姆，若出喙講台語逐个親像仝一家伙的人。
台灣話是上kài斯文的言語，諺語、俗語佮孽詰仔話（gia̍t-khiat-á~），講–起來嘛真趣味，你若拄著代誌袂順序，講一句「拍斷手骨顛倒勇」是誠（tsiânn）好的鼓勵；若是讀冊無認真，大人就會講「少年袂曉想，食老就毋成樣」；若是逐个傷（siunn）吵就會講恁「墓仔埔放炮，吵死人」；若是日子想欲較清閒，有這句「時到時擔（tng），無米才來煮蕃藷湯」的氣魄，生活自然就輕鬆仔過。其實，古早俗語是古早樣，舊台灣嘛愛傳予（hōo）新台灣，台語文化毋通斷，現在俗語嘛著愛予伊生湠（thuànn）。
台灣是咱的土地，芋仔、蕃藷愛結合，語言袂使無公平，台灣母語著愛挽回，祖孫仔若無法度對話，致到鴨仔聽雷的時陣，就出問題–啦；上kài可憐是老大人佮孫講話著愛用臆–的，祖公仔留–落來的言語，囝（kiánn）孫哪會使放袂記–得？這款譀古（hàm-kóo）的代誌，是欲狼狽到佇時–咧？祖先的智慧無地（tè） 比，文化的遺產愛維持，台灣話，咱就緊共伊學–起來。 （約430字） （編號：6 永靖國小 黃慧