分類：台語
2007/12/17 15:25
027 讀冊真快樂
無偌久進前，新聞咧報導講：學生讀冊的壓力傷（siunn）過重，走去自殺，引起一般社會的議論紛紛；想看覓（māi）–咧，壓力是對佗位來（ùi toh-uì）–的，是學校、爸母、抑（iah）是本身？讀冊真正是遐痛苦– nih？誠濟（tsē）囡仔攏講艱苦，連我嘛有感覺–著。
若準先天不足，後天失調，學生一定是慘kah有看–見才著，毋閣這款誠少，一般正常的囡仔愛去受教育，一級一級一直讀，參加真競爭的考試，無暝無日咧拚（piànn），莫怪真濟家長佮囡仔攏做夥咧讀冊，向望別人叫我第一名，啊毋閣無一定會達著所想–的；實在講，大人、囡仔攏真無捨施（siá-sì）。
我感覺，這是社會錯誤的觀念所造成的，可憐–的毋是kan-na囡仔，是大人佮老師攏仝款咧受苦。其實若講莫欲計較第幾名，莫欲佮別人來比較，對家己的興趣來讀冊，我感覺應該是真快樂–的。
想看覓，有遐呢濟智識，遐呢濟趣味的物件欲學，這當然是快樂的代誌，你講是毋是–neh？我希望逐（ta̍k）个攏好好仔了解，抱著這種觀念來教囡仔讀冊，這才是真正健康閣正確的想法，毋通為著小小的面子，來做出家己痛苦、囡仔嘛悲哀的代誌，愛會記–得，毋通佮別人比較，讀冊才有真正的快樂！（約320字）
（編號：107 明正國小 黃瑞汝）