黎明國小 台語 每週一歌 莊文龍 編

學生朋友學台語，

大聲開喙上歡喜，

會曉讀冊唸歌詩，

這款快樂無地比。

拍算計畫勤讀冊，

拚命認真莫留白，

讀久體會寶貝提，

冊中好空在你踅。

做人謙虛有禮貌，

看人就笑愛頕頭，

朋友弟兄好慷交，

金銀財寶到咱兜。

上課做人守規矩，

跤手緊快聽教示，

訓練家己好腦智，

創新應變得先機。

穿插好看愛清氣，

指甲捷修照順序，

身軀定洗真四序，

環境清幽樂安居。

行善積德無所求，

公共道德好理由，

知足常樂免憂愁，

貢獻社會有成就。

你我攏是好朋友，

鬥陣讀冊手牽手，

做伙運動佮拍球，

好聽的歌同齊唱。

互相尊重佮支持，

遵守規矩聽教示，

注意公平愛講理，

乖巧聰明捌代誌。

駛車守法愛小心，

互相相讓著愛忍，

燒酒千萬毋通啉，

若無一定會相唚。

我是負責好學生，

上課袂吵蓋安靜，

專心用功上正經，

考試攏考第一等。

身體健康食百二，

萬事如意真歡喜，

逐工快樂笑嘻嘻，

我會永遠有孝你。

黎明學生真正好，

讀冊認真人呵咾，

上課規矩通人褒，

健康可愛閣活寶。

台灣的人上蓋好，

認真骨力拍拚做，

古意老實真可靠，

樸實勤儉袂駱駝。

逐家趕緊做伙來，

爭取冠軍提金牌，

提著頭名人人愛，

眾人歡喜笑咍咍。

拄著問題愛開喙，

請人幫贊想較開，

勇敢拍拚靠智慧，

咱一世人袂枉費。

若欲成功愛立志，

跤踏實地有志氣，

計畫周全用計智，

堅心完成心若鐵。

感恩愛物閣惜福，

互相疼惜袂孤獨，

好的相傳莫作惡，

將心比心真快樂。

專心聽課真輕鬆，

一心兩用雙頭空，

拍拚讀冊有希望，

實現理想來圓夢。

仙人拍鼓有時錯，

跤步踏差啥人無，

人非聖賢誰無過，

當作修行莫煩惱。

講著讀冊真趣味，

一二三四A B C，

ㄅㄆㄇㄈＤｏＲｅＭｉ，

鹹汫苦澀酸甘甜。

美麗人生愛有夢，

孤會曉講攏毋動，

繁華美夢總是空，

免想艱難像山崩。