蔡義德 – 臺語正字歌詞部落格https://2blog.ilc.edu.tw/32745這是一個臺語歌曲正字網站Fri, 28 Feb 2025 03:30:05 +0000zh-TWhourly1https://wordpress.org/?v=6.6.7https://2blog.ilc.edu.tw/32745/wp-content/uploads/sites/1271/2020/04/cropped-Hydrangeas-1-32x32.jpg蔡義德 – 臺語正字歌詞部落格https://2blog.ilc.edu.tw/327453232 鼓勵https://2blog.ilc.edu.tw/32745/2025/02/28/%e9%bc%93%e5%8b%b5-4/Fri, 28 Feb 2025 03:30:05 +0000https://2blog.ilc.edu.tw/32745/?p=125171
《鼓勵》Kóo-lē
蔡義德Tshuà Gī-tik
——————————————
人生的路長長短短
jîn-sing ê lōo tn̂g-tn̂g-té-té
鋩角著愛看予詳細
mê-kak tio̍h-ài khuànn hōo siông-sè
朋友兄弟逐家鬥陣交陪
pîng-iú hiann-tī ta̍k-ke tàu-tīn kau-puê
事事項項毋通烏白花
sū-sū-hāng-hāng m̄-thang oo-pe̍h hue
人生的路坎坎坷坷
jîn-sing ê lōo khám-khám-khia̍t-khia̍t
方向著愛掠予好勢
hong-hiòng tio̍h-ài lia̍h hōo hó-sè
拍拚努力
phah-piànn lóo-li̍k
創造好的機會
tshòng-tsō hó ê ki-huē
最後成功
tsuè-āu sîng-kong
一定是咱的
it-tīng sī lán ê
無論風霜偌濟
bô-lūn hong-song guā-tsuē
苦楚偌濟
khóo-tshóo guā-tsuē
跤踏實地
kha ta̍h si̍t-tē
將心比心
tsiong-sim pí-sim
逐家徛同齊
ta̍k-ke khiā tâng-tsê
所有的批評
sóo-ū ê phue-phîng
共伊當做是鼓勵
kā-i tòng-tsuè sī kóo-lē
化做力量
huà-tsuè li̍k-liōng
堅持拚到底
kian-tshî piànn tàu té
—
最後成功
tsuè-āu sîng-kong
一定是咱的
it-tīng sī lán ê
]]>友情歌https://2blog.ilc.edu.tw/32745/2025/02/28/%e5%8f%8b%e6%83%85%e6%ad%8c/Fri, 28 Feb 2025 03:28:17 +0000https://2blog.ilc.edu.tw/32745/?p=125168
《友情歌》Iú-tsîng Kua
蔡義德Tshuà Gī-tik
——————————————
阮只是一个
gún tsí-sī tsi̍t-ê
庄跤囡仔
tsng-kha gín-á
爸母用心計較將阮晟
pē-bú iōng-sim kè-kàu tsiong gún tshiânn
阮只有堅心來唱歌
gún tsí-ū kian-sim lâi tshiùnn-kua
才有今日舞臺頂的我
tsiah ū kim-ji̍t bú-tâi tíng ê guá
友情歌
iú-tsîng kua
阮是為恁來寫
gún sī uī lín lâi siá
佇心內唱出
tī sim-lāi tshiùnn-tshut
彼句感謝
hit kù kám-siā
友情歌
iú-tsîng kua
有恁才有我
ū lín tsiah ū guá
點點滴滴
tiám-tiám-tih-tih
阮感動佇心肝
gún kám-tōng tī sim-kuann
阮唱一聲
gún tshiùnn tsi̍t-siann
恁就應千聲
lín tiō ìn tshian-siann
阮唱一聲
gún tshiùnn tsi̍t-siann
恁就綴萬聲
lín tiō tè bān-siann
感謝一路恁的陪伴
kám-siā tsi̍t-lōo lín ê puê-phuānn
也有真心體會阮的心聲
iā ū tsin-sim thé-huē gún ê sim-siann
阮唱一聲
gún tshiùnn tsi̍t-siann
恁就應千聲
lín tiō ìn tshian-siann
阮唱一聲
gún tshiùnn tsi̍t-siann
恁就綴萬聲
lín tiō tè bān-siann
感謝一路恁的陪伴
kám-siā tsi̍t-lōo lín ê puê-phuānn
也有真心體會阮的心聲
iā ū tsin-sim thé-huē gún ê sim-siann
]]>候時機https://2blog.ilc.edu.tw/32745/2025/02/28/%e5%80%99%e6%99%82%e6%a9%9f-2/Fri, 28 Feb 2025 03:26:14 +0000https://2blog.ilc.edu.tw/32745/?p=125165
《候時機》Hāu Sî-ki
蔡義德Tshuà Gī-tik
——————————————
頂司管下司
tíng-si kuán ē-si
鋤頭管畚箕
tî-thâu kuán pùn-ki
算來算去
sǹg-lâi-sǹg-khì
我只有管家己
guá tsí-ū kuán ka-kī
別人的金錢是懸拄天
pa̍t-lâng ê kim-tsînn sī kuân tú-thinn
阮的褲袋仔
gún ê khòo-tē-á
不時袋磅子
put-sî tē pōng-tsí
命䆀總是怨八字
miā bái tsóng-sī uàn peh-jī
前世人
tsîng-sì-lâng
無燒好香來保庇
bô sio hó-hiunn lâi pó-pì
運䆀總是怪時機
ūn bái tsóng-sī kuài sî-ki
敢是今生來了毋著時
kám-sī kim-sing lâi liáu m̄-tio̍h-sî
啊~世事扶扶挺挺無趣味
ah~ sè-sū phôo-phôo-thánn-thánn bô tshù-bī
啊~講四講三完全由在伊
ah~ kóng-sù kóng-sann uân-tsuân iû-tsāi i
做人著愛有志氣
tsuè-lâng tio̍h-ài ū tsì-khì
大隻雞慢啼
tuā tsiah ke bān thî
上䆀暫時轉去食家己
siōng bái tsiām-sî tńg-khì tsia̍h-ka-kī
]]>陪你到老https://2blog.ilc.edu.tw/32745/2025/02/28/%e9%99%aa%e4%bd%a0%e5%88%b0%e8%80%81-2/Fri, 28 Feb 2025 03:24:24 +0000https://2blog.ilc.edu.tw/32745/?p=125162
《陪你到老》Puê Lí Kàu Lāu
蔡義德Tshuà Gī-tik
——————————————
痴心為你留
tshi-sim uī lí lâu
對你的愛
tuì lí ê ài
一日一日厚
tsi̍t-ji̍t tsi̍t-ji̍t kāu
有你溫柔陪佇身邊
ū lí un-jiû puê tī sin-pinn
佇阮心中
tī gún sim-tiong
你上重要
lí siōng tiōng-iàu
有你牽牢牢
ū lí khan tiâu-tiâu
牽你的手四界行透透
khan lí ê tshiú sì-kè kiânn-thàu-thàu
每日對你講著情話
muí-ji̍t tuì lí kóng-tio̍h tsîng-uē
講偌濟愛你的話
kóng guā-tsuē ài lí ê uē
攏無夠
lóng bô-kàu
我會陪你到老
guá ē puê lí kàu lāu
將你的愛全部囥心頭
tsiong lí ê ài tsuân-pōo khǹg sim-thâu
幸福就是有你的等候
hīng-hok tiō-sī ū lí ê tán-hāu
有你陪我吵吵鬧鬧
ū lí puê guá tshá-tshá-nāu-nāu
我會陪你到老
guá ē puê lí kàu lāu
對你的愛
tuì lí ê ài
一生袂變調
it-sing buē piàn-tiāu
毋管未來風雨有偌透
m̄-kuán bī-lâi hong-hōo ū guā thàu
我會永遠
guá ē íng-uán
將你攬牢牢
tsiong lí lám tiâu-tiâu
—
毋管未來風雨
m̄-kuán bī-lâi hong-hōo
有偌透
ū guā thàu
我會將你攬牢牢
guá ē tsiong lí lám tiâu-tiâu
]]>感恩感謝https://2blog.ilc.edu.tw/32745/2025/02/28/%e6%84%9f%e6%81%a9%e6%84%9f%e8%ac%9d/Fri, 28 Feb 2025 03:22:41 +0000https://2blog.ilc.edu.tw/32745/?p=125159
《感恩感謝》Kám-un Kám-siā
蔡義德Tshuà Gī-tik
——————————————
既然你我有緣來熟似
kì-jiân lí guá ū-iân lâi si̍k-sāi
路遙的馬力
lōo iâu ê má-li̍k
人心在
jîn-sim tsāi
毋管過去有偌無奈
m̄-kuán kuè-khì ū guā bô-nāi
咱也做伙勇敢行過來
lán iā tsuè-hué ióng-kám kiânn–kuè-lâi
有人咧講
ū-lâng teh kóng
天總會安排
thinn tsóng ē an-pâi
冬天若過了
tang-thinn nā kuè-liáu
春天來
tshun-thinn lâi
無論時機好抑䆀
bô-lūn sî-ki hó ia̍h bái
歡喜做
huann-hí tsuè
阮就會甘願揹
gún tiō ē kam-guān phāinn
我感恩
guá kám-un
感謝有恁的愛
kám-siā ū lín ê ài
我感恩
guá kám-un
感謝有恁的關懷
kám-siā ū lín ê kuan-huâi
一世人
tsi̍t-sì-lâng
也行過了數十載
iā kiânn kuè-liáu sòo-tsa̍p tsáinn
因為恁
in-uī lín
我的性命才精彩
guá ê sìnn-miā tsiah tsing-tshái
我感恩
guá kám-un
感謝有恁的愛
kám-siā ū lín ê ài
我感恩
guá kám-un
感謝有恁的關懷
kám-siā ū lín ê kuan-huâi
佇心內
tī sim-lāi
感受有恁的疼愛
kám-siū ū lín ê thiànn-ài
我會堅持
guá ē kian-tshî
面對我人生舞臺
bīn-tuì guá jîn-sing bú-tâi
]]>你是我的力量https://2blog.ilc.edu.tw/32745/2025/02/28/%e4%bd%a0%e6%98%af%e6%88%91%e7%9a%84%e5%8a%9b%e9%87%8f/Fri, 28 Feb 2025 03:21:01 +0000https://2blog.ilc.edu.tw/32745/?p=125156
《你是我的力量》Lí Sī Guá ê Li̍k-liōng
蔡義德Tshuà Gī-tik
——————————————
滾滾的紅塵中
kún-kún ê âng-tîn tiong
啥人是真英雄
siánn-lâng sī tsin ing-hiông
滄桑藏入心中
tshong-song tshàng ji̍p sim-tiong
堅強是我的笑容
kian-kiông sī guá ê tshiò-iông
誰比誰較威風
siáng pí siáng khah ui-hong
誰比誰閣較倔強
siáng pí siáng koh-khah ku̍t-kiông
我的行李裝著風霜
guá ê hîng-lí tsng tio̍h hong-song
堅定我的方向
kian-tīng guá ê hong-hiòng
我用我的性命
guá iōng guá ê sìnn-miā
勇敢向前衝
ióng-kám hiòng-tsiân tshiong
毋驚路頭上
m̄-kiann lōo-thâu siōng
有偌濟的波浪
ū guā-tsuē ê pho-lōng
我毋管別人
guá m̄-kuán pa̍t-lâng
笑阮戇笑阮狂
tshiò gún gōng tshiò gún kông
因為你是我的力量
in-uī lí sī guá ê li̍k-liōng
]]>思念無緣的人https://2blog.ilc.edu.tw/32745/2025/02/28/%e6%80%9d%e5%bf%b5%e7%84%a1%e7%b7%a3%e7%9a%84%e4%ba%ba/Fri, 28 Feb 2025 03:19:25 +0000https://2blog.ilc.edu.tw/32745/?p=125153
《思念無緣的人》Su-liām Bô-iân ê Lâng
蔡義德Tshuà Gī-tik
——————————————
夜深更
iā tshim-kinn
落著毛毛的雨水
lo̍h tio̍h mn̂g-mn̂g ê hōo-tsuí
為何哪會為情咧稀微
uī-hô ná ē uī tsîng teh hi-bî
寂寞的暗暝
tsi̍k-bo̍k ê àm-mî
想起熱戀彼當時
siūnn-khí jia̍t-luân hit-tong-sî
甜言蜜語
tinn-giân-bi̍t-gí
隨風消失去
suî hong siau-sit–khì
月光暝
gue̍h-kng-mî
孤單坐在窗門邊
koo-tuann tsē tsāi thang-mn̂g pinn
親像笑阮相思無藥醫
tshin-tshiūnn tshiò gún siunn-si bô-io̍h-i
難忘的過去
lân-bōng ê kuè-khì
想著兩人的情義
siūnn-tio̍h nn̄g-lâng ê tsîng-gī
思念的人
su-liām ê lâng
毋知佇佗位
m̄-tsai tī tó-uī
提袂出勇氣
the̍h buē-tshut ióng-khì
毋敢傳Line去予你
m̄-kánn thuân Line khì hōo lí
只有偷偷看你的FB
tsí-ū thau-thau khuànn lí ê FB
雖然我佮你
sui-jiân guá kah lí
已經是過去
í-king sī kuè-khì
猶原也是會來想起你
iu-guân iā-sī ē lâi siūnn-khí lí
落雨暝
lo̍h-hōo mî
雨水滴啊滴啊滴
hōo-tsuí tih–ah tih–ah tih
閣想起無緣彼个伊
koh siūnn-khí bô-iân hit ê i
]]>心毋願離https://2blog.ilc.edu.tw/32745/2024/11/10/%e5%bf%83%e6%af%8b%e9%a1%98%e9%9b%a2/Sun, 10 Nov 2024 06:39:26 +0000https://2blog.ilc.edu.tw/32745/?p=115258
《心毋願離》Sim M̄-guān Lî
蔡義德Tshuà Gī-tik
——————————————
風吹過
hong tshue–kuè
紅花落地
âng-hue lo̍h-tē
情難捨
tsîng lân-siá
離葉離枝
lî-hio̍h lî-ki
幸福夢斷
hīng-hok bāng tuān
啊~心所愛的人
ah~ sim sóo ài ê lâng
浮浮沉沉心無依
phû-phû-tîm-tîm sim bô-i
若是夢中會當來相見
nā sī bāng-tiong ē-tàng lâi sann-kìnn
我也毋願醒
guá iā m̄-guān tshínn
猶原猶原愛著你
iu-guân iu-guân ài tio̍h lí
分開了後
hun-khui liáu-āu
心內才知影
sim-lāi tsiah tsai-iánn
你佮我的愛
lí kah guá ê ài
情若到
tsîng nā kàu
緣就離
iân tiō lî
啊~我心毋願離
ah~ guá sim m̄-guān lî
風吹花落
hong tshue hue lo̍h
心稀微
sim hi-bî
]]>思念袂停https://2blog.ilc.edu.tw/32745/2024/11/10/%e6%80%9d%e5%bf%b5%e8%a2%82%e5%81%9c/Sun, 10 Nov 2024 06:37:23 +0000https://2blog.ilc.edu.tw/32745/?p=115255
《思念袂停》Su-liām Buē-thîng
蔡義德Tshuà Gī-tik
——————————————
來到懷念碼頭邊
lâi kàu huâi-liām bé-thâu pinn
踅來踅去
se̍h-lâi-se̍h-khì
難忘過去
lân-bōng kuè-khì
時常想起著
sî-siông siūnn-khí tio̍h
你迷人的氣質
lí bê-lâng ê khì-tsit
看來看去
khuànn-lâi-khuànn-khì
你上媠
lí siōng suí
雖然已經來分開
sui-jiân í-king lâi hun-khui
夢中不時叫著你
bāng-tiong put-sî kiò tio̍h lí
枕頭邊
tsím-thâu pinn
猶原留著你的芳水味
iu-guân lâu tio̍h lí ê phang-tsuí bī
思念袂停
su-liām buē-thîng
相思難離
siunn-si lân-lî
毋知心愛彼个伊
m̄-tsai sim-ài hit ê i
敢會將我放袂記
kám ē tsiong guá pàng-buē-kì
啊~心所愛的人
ah~ sim sóo ài ê lâng
予我情歌唱規暝
hōo guá tsîng-kua tshiùnn kui-mî
]]>為愛乾杯https://2blog.ilc.edu.tw/32745/2024/11/10/%e7%82%ba%e6%84%9b%e4%b9%be%e6%9d%af-2/Sun, 10 Nov 2024 06:35:50 +0000https://2blog.ilc.edu.tw/32745/?p=115252
《為愛乾杯》Uī Ài Kan-pue
蔡義德Tshuà Gī-tik
——————————————
踮這个茫茫人海
tiàm tsit ê bâng-bâng jîn-hái
有緣來熟似
ū-iân lâi si̍k-sāi
毋通辜負天意安排
m̄-thang koo-hū thinn-ì an-pâi
好好珍惜緣份
hó-hó tin-sioh iân-hūn
才應該
tsiah ing-kai
今夜咱做陣來
kim-iā lán tsuè-tīn lâi
為愛乾杯
uī ài kan-pue
用咱的真情來交陪
iōng lán ê tsin-tsîng lâi kau-puê
歡喜啉落去
huann-hí lim–lo̍h-khì
杯底毋通飼金魚
pue-tué m̄-thang tshī kim-hî
啉啊啉啉啉
lim–ah lim lim lim
啉予歡喜
lim hōo huann-hí
愛啊愛愛愛
ài–ah ài ài ài
愛予澈底
ài hōo thiat-té
今朝有酒今朝醉
kim-tiau iú tsiú kim-tiau tsuì
燒酒捀起
sio-tsiú phâng khí
為愛乾杯
uī ài kan-pue
]]>