《美麗的煮飯花》Bí-lē ê Tsú-pn̄g-hue

周月綺Tsiu Gua̍t-khí(小百合Sió-pik-ha̍p)

——————————————

暗頭仔才開花

àm-thâu-á tsiah khui-hue

菜市仔花店無塊賣

tshài-tshī-á hue-tiàm bô-tè buē

袂佮人相爭搶美麗

buē kah lâng sann-tsinn tshiúnn bí-lē

恬恬開咧厝内底

tiām-tiām khui teh tshù lāi-té

圍裙穿咧

uî-kûn tshīng–leh

迎接轉來的

gîng-tsiap tńg–lâi ê

一家口囡仔大細

tsi̍t-ke-kháu gín-á tuā-sè

上關心的是你我每一个

siōng kuan-sim–ê sī lí guá muí tsi̍t-ê

腹肚會枵抑是袂

pak-tóo ē iau ia̍h-sī buē

煮飯花啊煮飯花

tsú-pn̄g-hue–ah tsú-pn̄g-hue

總是面笑笑

tsóng-sī bīn tshiò-tshiò

無閒柴米油鹽

bô-îng tshâ-bí-iû-iâm

辛苦頭犁犁

sin-khóo thâu lê-lê

煮飯花啊煮飯花

tsú-pn̄g-hue–ah tsú-pn̄g-hue

用灶跤的背影

iōng tsàu-kha ê puē-iánn

用愛恬恬扶持咱這个家

iōng ài tiām-tiām hû-tshî lán tsit ê ke

世界中的花

sè-kài tiong ê hue

世界中的花

sè-kài tiong ê hue

你上美麗

lí siōng bí-lē

暗頭仔才開花

àm-thâu-á tsiah khui-hue

菜砧敧硞聲做陪

tshài-tiam khi-khok siann tsò-puê

無計較付出少抑濟

bô kè-kàu hù-tshut tsió ia̍h tsuē

為一家口歡喜做

uī tsi̍t-ke-kháu huann-hí tsuè

面對出外拍拚的大細

bīn-tuì tshut-guā phah-piànn ê tuā-sè

總是搝著電話

tsóng-sī khiú tio̍h tiān-uē

千聲叮嚀

tshian-siann ting-lîng

萬句交代

bān-kù kau-tài

一定著愛食飽呢

it-tīng tio̍h-ài tsia̍h pá–neh

煮飯花啊煮飯花

tsú-pn̄g-hue–ah tsú-pn̄g-hue

親身用背影

tshin-sin iōng puē-iànn

教阮賢妻良母著按怎做

kà gún hiân-tshe liông-bió tio̍h án-tsuánn tsuè

煮飯花啊煮飯花

tsú-pn̄g-hue–ah tsú-pn̄g-hue

圍裙褪起來

uî-kûn thǹg–khí-lâi

教阮按怎穿才會好勢

kà gún án-tsuánn tshīng tsiah ē hó-sè

小享福一下

sió hiáng-hok tsi̍t-ē

阿媽的煮飯花

a-má ê tsú-pn̄g-hue

阿母的煮飯花

a-bú ê tsú-pn̄g-hue

世界上美麗

sè-kài siōng bí-lē

阿媽的煮飯花

a-má ê tsú-pn̄g=hue

阿母的煮飯花

a-bú ê tsú-pn̄g-hue

阮會傳予落去

gún ê thuân hōo lueh

《風鈴》Hong-lîng

周月綺Tsiu Gua̍t-khí(小百合Sió-pi̍k-ha̍p)

——————————————

又閣是起風時

iū-koh sī khí-hong sî

啥人撥弄風鈴

siánn-lâng puah-lāng hong-lîng

擾亂耳

jiáu-luān hīnn

鈴聲幽幽

lîng-siann iu-iu

一遍一遍訴情意

tsi̍t-piàn-tsi̍t-piàn sòo tsîng-ì

是啥人咧作弄阮的痴

sī siánn-lâng teh tsok-lōng gún ê tshi

風停時

hong thîng sî

莫想起

mài siūnn-khí

啥人多事心內偷擛扇

siánn-lâng to-sū sim-lāi thau ia̍t-sìnn

擛甲相思風鈴

ia̍t kah siunn-si hong-lîng

一暝復一暝

tsi̍t-mî hiù tsi̍t-mî

叮叮噹噹

tin-tin-tong-tong

勸攏毋肯止

khǹg lóng m̄-khíng tsí

風若無咧身邊

hong nā bô teh sin-pinn

風鈴掛遮

hong-lîng kuà tsia

敢有意義

kám-ū ì-gī

外頭風聲

guā-thâu hong-siann

我揀好的安慰自己

guá kíng hó–ê an-uì tsū-kí

風若是無情意

hong nā-sī bô tsîng-ì

敢會唚我刁故意

kám-ē tsim guá thiau-kòo-ì

甘願相信

kam-guān siong-sìn

你眼中的三分甜

lí gán-tiong ê sann-hun tinn

—

風自由飛

hong tsū-iû pue

天經地義

thian-king tē-gī

等待是風鈴的八字

tán-thāi sī hong-lîng ê pueh-jī

我嘛知避風港

guá mā tsai pī-hong-káng

遮毋是唯一

tse m̄-sī uî-it

我願意

guá guān-ì

我等你

guá tán lí

風若無咧身邊

hong nā bô teh sin-pinn

風鈴袂響失意義

hong-lîng buē hiáng sit ì-gī

掛踮高枝

kuà tiàm ko-ki

幸福也是欠一味

hīng-hok iā-sī khiàm tsi̍t-bī

風若是無情意

hong nā-sī bô tsîng-ì

嘛請共阮小暗示

mā tshiánn kā gún sió àm-sī

解鈴猶原需要結鈴的你

kái-lîng iû-guân su-iàu kat-lîng ê lí

解鈴猶原需要結鈴的你

kái-lîng iû-guân su-iàu kat-lîng ê lí

風鈴

六字部

美麗的煮飯花