《可愛的薔薇》Khó-ài ê Tshiûnn-bî
吳晉淮Ngôo Tsìn-huâi
——————————————
人生的青春味
jîn-sing ê tshing-tshun bī
彷彿在夢裡
hóng-hut tsāi bāng-lí
欣慕著糖甘蜜甜
him-bōo tio̍h thn̂g-kam-bi̍t-tinn
快樂情綿綿
khuài-lo̍k tsîng mî-mî
可比一蕊薔薇花
khó-pí tsi̍t-luí tshiûnn-bî-hue
開在蝴蝶的身邊
khui tsāi ôo-tia̍p ê sin-pinn
戀戀不捨心歡喜
luân-luân put-siá sim huann-hí
甘蜜的薔薇
kam-bi̍t ê tshiûnn-bî
甘蜜的薔薇
kam-bi̍t ê tshiûnn-bî
永遠毋願離開你
íng-uán m̄-guān lī-khui lí

清風的好情意
tshing-hong ê hó tsîng-ì
搖動白薔薇
iô-tāng pe̍h tshiûnn-bî
宛然是純情少女
uán-jiân sī sûn-tsîng siàu-lú
新鮮白粉味
sin-sian pe̍h-hún bī
假使男性當青春
ká-sú lâm-sìng tng tshing-tshun
抱著熱情的當時
phāu tio̍h jia̍t-tsîng ê tong-sî
啥人袂來思慕伊
siánn-lâng buē lâi su-bōo i
純情的薔薇
sûn-tsîng ê tshiûnn-bî
純情的薔薇
sûn-tsîng ê tshiûnn-bî
永遠毋願離開你
íng-uán m̄-guān lī-khui lí

窗邊的雨水滴
thang-pinn ê hōo-tsuí tih
沃著紅薔薇
ak tio̍h âng tshiûnn-bî
加添著高尚芳味
ka-thiam tio̍h ko-sióng phang-bī
飄滿了四邊
phiau buán liáu sì-pinn
親像情火熱紅紅
tshin-tshiūnn tsîng-hé jia̍t âng-âng
配合一點的潤味
phuè-ha̍p tsi̍t-tiám ê jūn bī
深深刻在阮心邊
tshim-tshim khik tsāi gún sim-pinn
粉紅的薔薇
hún-âng ê tshiûnn-bî
粉紅的薔薇
hún-âng ê tshiûnn-bî
永遠毋願離開你
íng-uán m̄-guān lī-khui lí

《可恨你一人》Khó-hūn Lí Tsi̍t-lâng (五月花)
吳晉淮Ngôo Tsìn-huâi
——————————————
↓↓—(口白)—↓↓
天下的女性百百款
thian-hā ê lú-sìng pah-pah-khuán
純情純義頭一層
sûn-tsîng sûn-gī thâu-tsi̍t-tsân
無奈伊是這款楊花水性
bû-nāi i sī tsit khuán iông-hua tsuí-sìng
曷無帶念著十年的恩愛
ia̍h bô tài-liām tio̍h tsa̍p-nî ê un-ài
當於五月花出現的時
tng-î gōo-gue̍h-hue tshut-hiān ê sî
伊就絕情做伊去囉
i tō tsua̍t-tsîng tsò i khì–looh
唉~我欲怨嘆啥物人咧
haih~ guá beh uàn-thàn sí-mih lâng–leh
↑↑—(口白)—↑↑

紅燈綠燈照街巷
âng-ting li̍k-ting tsiò kue-hāng
世間也有這款人
sè-kan iā ū tsit khuán lâng
十年恩愛甘願放
tsa̍p-nî un-ài kam-guān pàng
下海去做煙花人
hā-hái khì tsuè ian-hua lâng
啊~五月花
ah~ gōo-ge̍h-hue
可恨你一人
khó-hūn lí tsi̍t-lâng

↓↓—(口白)—↓↓
世間有真濟男性
sè-kan ū tsin tsē lâm-sìng
佇咧放捒女性
tī-teh pàng-sat lú-sìng
但是只有我
tān-sī tsí-ū guá
只有是我被女性
tsí-ū guá sī pī lú-sìng
放捒的男性
pàng-sat ê lâm-sìng
我我恨你
guá guá hūn lí
五月花
gōo-gue̍h-hue
我恨你啦
guá hūn lí–lah
↑↑—(口白)—↑↑

五月花蕊亂亂開
gōo-ge̍h-hue-luí luān-luān khai
假情假愛的世界
ké-tsîng ké-ài ê sè-kài
自嘆薄命無人愛
tsū thàn po̍k-bīng bô-lâng ài
薄情僥我不應該
po̍h-tsîng hiau guá put ìng-kai
啊~五月花
ah~ gōo-ge̍h-hue
可恨不可愛
khó-hūn put khó-ài

↓↓—(口白)—↓↓
男性行酒家
lâm-sìng kiânn tsiú-ka
是為著應酬
sī uī-tio̍h ìng-siû
但是只有伊
tān-sī tsí-ū i
只有伊來辜負著我一片的真心
tsí-ū i lâi koo-hū tio̍h guá it-phiàn ê tsin-sim
甘願下海做酒女
kam-guān hā-hái khì tsò tsiú-lú
這是啥物道理呢
tse sī siánn-mih tō-lí–neh
啍!啍!啍!人講得無錯
hngh! hngh! hngh! lâng kóng tit bô-tshò
最毒婦人心就是你啦
tsuè to̍k hū-jîn-sim tsiū-sī lí–lah
↑↑—(口白)—↑↑

做著歹田望後冬
tsuè tio̍h pháinn-tshân bāng āu-tang
娶著歹某規世人
tshuā-tio̍h pháinn-bóo kui-sì-lâng
女性若驚採花蜂
lú-sìng nā kiann tshái-hue-phang
男性最怕漚花欉
lâm-sìng tsuè phà àu hue-tsâng

啊~五月花
ah~ gōo-ge̍h-hue
恨你一世人
hūn lí tsi̍t-sì-lâng
恨你一世人
hūn lí tsi̍t-sì-lâng
恨你一世人
hūn lí tsi̍t-sì-lâng

《春滿不夜城》Tshun Buán Put-iā-siânn
吳晉淮Ngôo Tsìn-huâi
——————————————
草木青翠
tsháu-bo̍k tshenn-tshuì
百花齊開
pah-hue tsê khui
好春天
hó tshun-thinn
天色清清
thinn-sik tshing-tshing
萬里無雲
bān-lí bô hûn
風微微
hong bî-bî
小姑娘生成真標緻
sió-koo-niû senn-sîng tsin phiau-tì
面白像茉莉
bīn pe̍h tshiūnn ba̍k-nī
對我使目箭
tuì guá sái-ba̍k-tsìnn
行過我身邊
kiânn kè guá sin-pinn

伊看我
i khuànn guá
我看伊
guá khuànn i
若親像有情意
ná-tshin-tshiūnn ū tsîng-ì
心茫茫
sim bông-bông
愛情隨風生
ài-tsîng suî hong sinn
快樂的都市
khuài-lo̍k ê too-tshī

紅燈綠燈
âng-ting li̍k-ting
光輝燦爛的燈影
kong-hui tshàn-lān ê ting-iánn
青春男女
tshing-tshun lâm-lú
雙雙對對妹伴兄
siang-siang tuì-tuì muāi phuānn hiann
親蜜蜜相招看電影
tshin-bi̍t-bi̍t sio-tsio khuànn tiān-iánn
出入咖啡廳
tshut-ji̍p ka-pi-thiann
天星光顯顯
thinn-tshenn kng hiánn-hiánn
月夜做陣行
ge̍h-iā tsò-tīn kiânn

月光光照山嶺
ge̍h kng-kng tsiò suann-niá
春花媠開滿埕
tshun-hue suí khui muá-tiânn
輕音樂
khin-im-ga̍k
愛情的歌聲
ài-tsîng ê kua-siann
春滿不夜城
tshun buán put-iā-siânn

月光光照山嶺
ge̍h kng-kng tsiò suann-niá
春花媠開滿埕
tshun-hue suí khui muá-tiânn
輕音樂
khin-im-ga̍k
愛情的歌聲
ài-tsîng ê kua-siann
春滿不夜城
tshun buán put-iā-siânn