序-六歲
《序-六歲》Sū – La̍k-huè
陳珍儀Tân Tin-gî
——————————————
細漢綴著阮阿姨
sè-hàn tuè tio̍h gún a-î
蹛佇苗栗市
tuà tī Miâu-li̍k-tshī
遐有真濟客家人
hia ū tsin tsē hàggá ngǐn
真濟好食物
tsin tsē hó-tsia̍h mi̍h
阿姨輕聲閣細語
a-î khin-siann koh sè-gí
教我練寫字
kà guá liān siá-jī
阿姨溫柔閣慈悲
a-î un-jiû koh tsû-pi
陪我唸歌詩
puê guá liām kua-si
阿姨伊知影我的心
a-î i tsai-iánn guá ê sim
刁工講
tiau-kang kóng
高雄佇山的後面
Ko-hiông tī suann ê āu-bīn
我定定徛佇窗仔邊
guá tiānn-tiānn khiā tī thang-á-pinn
期待佮阿母團圓
kî-thāi kah a-bú thuân-înn
啊~恬恬目屎滴
ah~ tiām-tiām ba̍k-sái tih
火車行到啊咿嘟
hué-tshia kiânn kàu–ah-ih-toh
阿毛咿嘟搐
a-moo ih-toh tiuh
哎喲磅空內
aih-iō pōng-khang lāi
磅空的水嘟搐搐銅
pōng-khang ê tsuí–toh tiuh-tiuh tâng
啊咿嘟阿毛啊咿嘟
ah-ih-toh a-moo–ah-ih-toh
搐啊咿嘟滴落來
tiuh–ah ih-toh tih–lo̍h-lâi
