眠夢
《眠夢》Bîn-bāng
李晉瑩Lí Tsìn-îng
——————————————
毋免煩惱
m̄-bián huân-ló
逐家攏轉來矣
ta̍k-ke lóng tńg–lâi ah
轉來陪你最後一路
tńg-lâi puê lí tsuè-āu tsi̍t-lōo
行李嘛共你款好佇遐
hîng-lí mā kā lí khuán hó tī hia
佳哉這馬
ka-tsài tsit-má
病疼攏飛走矣
pēnn-thiànn lóng pue tsáu–ah
你就安心沓沓仔行
lí tiō an-sim ta̍uh-ta̍uh-á kiânn
會記得穿燒食飽
ē-kì-tit tshīng sio tsia̍h pá
若是天頂會孤單
nā-sī thinn-tíng ē koo-tuann
咱做伙眠夢
lán tsò-hué bîn-bāng
若是無聊的時陣
nā-sī bô-liâu ê sî-tsūn
揣我來開講
tshuē guá lâi khai-káng
佇臺北拍拚的這幾冬
tī Tâi-pak phah-piànn ê tsit kuí-tang
有真濟代誌
ū tsin tsuē tāi-tsì
欲講予你來聽
beh kóng hōo lí lâi thiann
希望天頂袂孤單
hi-bāng thinn-tíng buē koo-tuann
有牽手陪伴
ū khan-tshiú puê-phuānn
希望有閒的時陣
hi-bāng ū-îng ê sî-tsūn
定定來看我
tiānn-tiānn lâi khuànn guá
等我嘛想你的暗暝
tán guá mā siūnn lí ê àm-mî
期待會夢見
kî-thāi ē bāng-kìnn
後世人閣予你來疼
āu-sì-lâng koh hōo lí lâi thiànn
—
若是天頂會孤單
nā-sī thinn-tíng ē koo-tuann
咱做伙眠夢
lán tsò-hué bîn-bāng
若是想我的時陣
nā-sī siūnn guá ê sî-tsūn
免驚
bián-kiann
我佇遮
guá tī tsia
就算你袂記阮的名
tiō-sǹg lí buē-kì gún ê miâ
你對阮的愛
lí tuì gún ê ài
永遠囥心肝
íng-uán khǹg sim-kuann
你是溫暖的阿爸
lí sī un-luán ê a-pa
親像咱的山
tshin-tshiūnn lán ê suann
一肩擔起咱全家
tsi̍t-kian tann khí lán tsuân-ke
度過每一冬
tōo-kuè muí tsi̍t-tang
風吹過想你的暗暝
hong tshue kuè siūnn lí ê àm-mî
當時會夢見後世人
tang-sî ē bāng-kìnn āu-sì-lâng
閣予你來疼
koh hōo lí lâi thiànn
若是你嘛思念我
nā-sī lí mā su-liām guá
咱做伙眠夢
lán tsò-hué bîn-bāng