秋田勸世歌-上
《秋田勸世歌／上》Tshiu-tiân Khuàn-sè-kua / Siōng
黃秋田N̂g Tshiu-tiân
——————————————
各位聽眾好兄弟
kok-uī thiann-tsiòng hó hiann-tī
聽我唸歌來講起
thiann guá liām-kua lâi kóng-khí
姓黃秋田我名字
sènn N̂g Tshiu-tiân guá miâ-jī
望恁疼惜佮支持
bāng lín thiànn-sioh kah tsi-tshî
諸位貴君我總請
tsu-uī kuì-kun guá tsóng tshiánn
勸世新歌分恁聽
khǹg-sè sin-kua pun lín thiann
勸咱心肝著扞定
khǹg lán sim-kuann tio̍h huānn tiānn
空茫命運毋通行
khong-bông miā-ūn m̄-thang kiânn
做人毋免傷怨嘆
tsuè-lâng m̄-bián siunn uàn-thàn
咱來?迌在世間
lán lâi thit-thô tsāi sè-kan
毋通埋怨咱頇顢
m̄-thang bâi-uàn lán han-bān
社會每人有困難
siā-huē muí lâng ū khùn-lân
世情如棋看現現
sè-tsîng jû kî khuànn-hiān-hiān
每棋每局會變遷
muí kî muí kio̍k ē piàn-tshian
做事勸恁愛良善
tsuè sū khǹg lín ài liông-siān
無事快樂小神仙
bô-sū khuài-lo̍k sió sîn-sian
勸咱大家著正經
khǹg lán tāi-ke tio̍h tsìng-king
認真拍拚求光榮
jīn-tsin phah-piànn kiû kong-îng
比人的命三不等
pí lâng ê miā sam-put-tíng
莫想貪心較清閒
mài siūnn tham-sim khah tshing-îng
閹雞毋通趁鳳飛
iam-ke m̄-thang thàn hōng pue
到時敢會著夯枷
kàu-sî kánn ē tio̍h giâ-kê
做人風流毋精濟
tsò-lâng hong-liû m̄ tsing-tsè
變甲木蝨頭殼爬
piàn kah ba̍k-sat thâu-khak pê
建置家庭傳後代
kiàn-tì ka-tîng thuân hiō-tāi
生囝傳孫是應該
senn kiánn thuân sun sī ing-kai
家庭某囝著擔帶
ka-tîng bóo-kiánn tio̍h tam-tài
養飼序細為將來
iúnn-tshī sī-sè uī tsiong-lâi
這段歌曲若講古
tsit tuānn kua-khik ná kóng-kóo
勸咱毋通做糊塗
khǹg lán m̄-thang tsuè hôo-tôo
娶兩个某真艱苦
tshuā nn̄g-ê bóo tsin kan-khóo
骨頭較?都會脯
kut-thâu khah tīng tio ē póo
看人濟某好名聲
khuànn-lâng tsē bóo hó miâ-siann
我就綴人尾後行
guá tiō tuè lâng bué-āu kiânn
加娶頭殼是加疼
ke tshuā thâu-khak sī ke thiànn
以我經驗講恁聽
í guá king-giām kóng lín thiann
看人濟某多福氣
khuànn-lâng tsē bóo to hok-khì
我就趁人娶細姨
guá tiō thàn lâng tshuā sè-î
一人一命歹相比
tsi̍t-lâng tsi̍t-miā pháinn sio-pí
娶來才知反悔遲
tshuā–lâi tsiah tsai huán-hué tî
咱的民族好傳統
lán ê bîn-tso̍k hó thuân-thóng
單翁隻某才正宗
tuann-ang tsiah-bóo tsiah tsiànn-tsong
想娶細姨有較戇
siūnn tshuā sè-î ū khah gōng
加娶毋是咧威風
ke tshuā m̄-sī teh ui-hong
人講一某無人知
lâng kóng tsi̍t-bóo bô-lâng tsai
娶兩个某相卸代
tshuā nn̄g-ê bóo sio-sià-tāi
兩家愛情難拍派
lióng-ka ài-tsîng lân phah-phài
厝內不時打擂臺
tshù-lāi put-sî tá-luî-tâi
一翁兩某分袂平
tsi̍t-ang nn̄g-bóo pun buē-pînn
愛情時常起相爭
ài-tsîng sî-siông khí sio-tsinn
大某細姨面若變
tuā-bóo sè-î bīn nā pìnn
氣著翁婿面齊青
khì-tio̍h ang-sài bīn tsiâu tshinn
想欲加娶來致蔭
siūnn-bueh ke tshuā lâi tì-ìm
顛倒煞做石磨心
tian-tò suah tsò tsio̍h-bō sim
看怹雙方起變面
khuànn in siang-hong khí pìnn-bīn
激心茶湯就袂啉
kik-sim tê-thng tiō buē lim
一時貪心想風騷
tsi̍t-sî tham-sim siūnn hong-so
趁人閣娶小老婆
thàn lâng koh tshuā sió lāu-pô
望欲娶來會和好
bāng-beh tshuā lâi ē hô-hó
無疑家庭起風波
bô-gî ka-tîng khí hong-pho
當然細姨也是某
tong-jiân sè-î iā-sī bóo
毋過大某毋讓步
m̄-koh tuā-bóo m̄ niū-pōo
害著翁婿加艱苦
hāi-tio̍h ang-sài ke kan-khóo
家內不時做戰埔
ka-lāi put-sî tsò tsiàn-poo
為著事業外面走
uī-tio̍h sū-gia̍p guā-bīn tsáu
毋知家庭亂操操
m̄-tsai ka-tîng luān-tshau-tshau
工課做完轉來到
khang-khuè tsò uân tńg-lâi kàu
細姨大某相爭投
sè-î tuā-bóo sio-tsenn tâu
大的講細伊僭權
tuā–ê kóng sè i tsiàm-kuân
細的講大壓霸番
sè–ê kóng tuā ah-pà huan
兩个愈罵愈毋願
nn̄g-ê jú mē jú m̄-guān
雙人出手又閣冤
siang-lâng tshut-tshiú iū-koh uan
一个出手相跤蹔
tsi̍t-ê tshut-tshiú siòng kha tsàm
一个起手覓頭鬃
tsi̍t-ê khí-tshiú bā thâu-tsang
予咱仙搝都袂放
hōo lán sian khiú tio bē pàng
真真有影磨死翁
tsin-tsin ū-iánn buâ-sí ang
盡力欲占占袂開
tsīn-li̍k beh tsiàm tsiàm bē-khui
實在有影難解圍
si̍t-tsāi ū-iánn lân kái-uî
氣著血都強欲呸
khì-tio̍h hueh to kiōng-beh phuì
欲知嘛莫踮做堆
bueh-tsai mā mài tiàm tsuè-tui
兩人相拍跤手緊
nn̄g-lâng sio-phah kha-tshiú kín
咱氣甲欲烏暗眩
lán khì kah beh oo-àm-hîn
拍甲一輾過一輾
phah kah tsi̍t-lìn kuè tsi̍t-lìn
欲叫啥人做公親
beh kiò siánn-lâng tsuè kong-tshin
拍甲褲破衫也落
phah kah khòo phuà sann iā làu
奶罩搝斷塗跤兜
ni-tà khiú tn̄g thôo-kha-tau
觀眾圍甲規門口
kuan-tsiòng uî kah kui mn̂g-kháu
袂輸佇咧拍拳頭
buē-su tī-teh phah kûn-thâu
真真有影卸世眾
tsin-tsin ū-iánn sià-sì-tsìng
拍甲褲破兼落胸
phah kah khòo phuà kiam làu hing
實在明明歹德行
si̍t-tsāi bîng-bîng pháinn tik-hīng
大某細姨起戰爭
tuā-bóo sè-î khí tsiàn-tsing
門口觀眾圍規堆
mn̂g-kháu kuan-tsiòng uî kui-tui
無人欲替怹解圍
bô-lâng bueh thè in kái-uî
嬸仔姆仔來到位
tsím–á ḿ–á lâi kàu-uī
佳哉將怹共掠開
ka-tsài tsiong in kā lia̍h khui
冤煞也著咱收尾
uan suah iā tio̍h lán siu-bué
好喙勻勻共怹
hó-tshuì ûn-ûn kā in huê
？任翁婿真歹做
?-jīm ang-sài tsin pháinn tsuè
也著佯戇頭犁犁
iā tio̍h tènn-gōng thâu lê-luê
咱著好喙雙爿勸
lán tio̍h hó-tshuì siang-pîng khǹg
好話講甲下頦酸
hó-uē kóng kah ē-huâi sng
姑情雙方著落軟
koo-tsiânn siang-hong tio̍h lo̍h-nńg
放心才敢閣出門
hòng-sim tsiah kánn koh tshut-mn̂g
雖是出外在外地
sui sī tshut-guā tsāi guā-tuē
心肝猶原分兩个
sim-kuann iu-guân pun nn̄g-ê
一心懸又一心低
tsi̍t-sim kuân iū tsi̍t-sim kē
恐驚兩个閣冤家
khióng-kiann nn̄g-ê koh uan-ke
日頭暗啦想欲轉
ji̍t-thâu àm–lah siūnn-bueh tńg
厝邊隔壁著先問
tshù-pinn keh-piah tio̍h sing mn̄g
探聽怹攏有食飯
thàm-thiann in lóng ū tsia̍h-pn̄g
才敢放心踏入門
tsiah kánn hòng-sim ta̍h ji̍p-mn̂g
入門頭先看日誌
ji̍p mn̂g thâu-sing khuànn ji̍t-tsì
今日初六是拜二
kia̋nn-ji̍t tshe-la̍k sī pài-jī
當時約束有規矩
tong-sî iok-sok ū kui-kí
雙日應該著細姨
siang-ji̍t ing-kai tio̍h sè-î
單數一三五九七
tuann-sòo it sam ngóo kiú tshit
是輪大某的當值
sī lûn tuā-bóo ê tong-ti̍t
二四六八的日子
jī sù lio̍k pat ê ji̍t-tsí
雙數應該著細姨
siang-sòo ing-kai tio̍h sè-î
入到老二房間內
ji̍p kàu láu-jī pâng-king lāi
講話煞驚大某知
kóng-uē suah kiann tuā-bóo tsai
半暝老大若使派
puànn-mê láu-tuā nā sái-phài
刁持拍囝哭咍咍
tiau-tî phah kiánn khàu hai-hai
輪到單日睏大房
lûn kàu tuann-ji̍t khùn tuā-pâng
老二伊就起無空
láu-jī i tiō khí-bô-khang
雖是毋敢變啥魍
sui sī m̄-kánn piàn siánn báng
總會摔西佮摔東
tsóng ē siak sai kah siak tang
拄著月大三十一
tú-tio̍h gue̍h tuā sann-tsa̍p-it
是我僥倖的日子
sī guá hiau-hīng ê ji̍t-tsí
兩爿房間毋敢出
lióng-pîng pâng-king m̄-kánn tshut
結果煞著睏廳邊
kiat-kó suah tio̍h khùn thiann pinn
廳邊膨椅做床鋪
thiann pinn phòng-í tsò tshn̂g-phoo
怎樣我著行這路
tsuánn-iūnn guá tio̍h kiânn tsit lōo
兩某才知真艱苦
nn̄g-bóo tsiah tsai tsin kan-khóo
總講就是愛孝孤
tsóng-kóng tiō-sī ài hàu-koo
倒在廳邊直直想
tó tsāi thiann pinn ti̍t-ti̍t siūnn
想無適當的主張
siūnn-bô sik-tòng ê tsú-tiunn
大某細姨毋相讓
tuā-bóo sè-î m̄ sio-niū
叫我如何通收場
kiò guá jû-hô thang siu-tiûnn
想到天光才好勢
siūnn kàu thinn kng tsiah hó-sè
是愛貪心娶兩个
sī ài tham-sim tshuā nn̄g-ê
大某細姨袂一體
tuā-bóo sè-î buē tsi̍t-thé
決定一人分一家
kuat-tīng tsi̍t-lâng pun tsi̍t-ke
