暗戀
《暗戀》Àm-luân
甲子慧Kah-tsí Huī (林沐樺)
——————————————
不時定定
put-sî tiānn-tiānn
就來行過你的身邊
tiō lâi kiânn kuè lí ê sin-pinn
希望會當來
hi-bāng ē-tàng lâi
吸引你的注意
khip-ín lí ê tsù-ì
遠遠看你行來
hn̄g-hn̄g khuànn lí kiânn–lâi
心臟強欲停止
sim-tsōng kiōng-beh thîng-tsí
這敢是戀愛的滋味
tse kám-sī luân-ài ê tsu-bī
這款三更半暝
tsit-khuán sann-kinn-puànn-mî
想一个人
siūnn tsi̍t-ê lâng
想到睏袂去
siūnn kàu khùn bē-khì
攑筆一直寫出伊的名字
gia̍h pit it-ti̍t siá tshut i ê miâ-jī
唉啊~一擺閣一擺
aih-ah~ tsi̍t-pái koh tsi̍t-pái
我愈寫愈想你
guá jú siá jú siūnn lí
毋知按怎對你表示
m̄-tsai án-tsuánn tuì lí piáu-sī
一句祕密的話
tsi̍t-kù pì-bi̍t ê uē
一直歹勢
it-ti̍t pháinn-sè
囥踮心肝內
khǹg tiàm sim-kuann-lāi
定定揣無機會
tiānn-tiānn tshuē-bô ki-huē
講出予你知
kóng-tshut hōo lí tsai
唉啊~一擺閣一擺
aih-ah~ tsi̍t-pái koh tsi̍t-pái
我強欲哭出來
guá kiōng-beh khàu–tshut-lâi
著急心情
tio̍h-kip sim-tsîng
啥人會知
siánn-lâng ē tsai
這敢是
tse kám-sī
我一个人的戀愛
guá tsi̍t-ê-lâng ê luân-ài
