爸爸的歌
《爸爸的歌》Pá-pah ê Kua
玟靈Bûn-lîng
——————————————
時常看見阮爸爸
sî-siông khuànn-kìnn gún pá-pah
毋知開喙欲講啥
m̄-tsai khui-tshuì beh kóng siánn
伊叫我坐過來泡茶
i kiò guá tsē kuè-lâi phàu-tê
聽伊講心內話
thiann i kóng sim-lāi uē
自伊細漢時講起
tsū i sè-hàn-sî kóng-khí
跤踏三輪車開始
kha ta̍h sann-lián-tshia khai-sí
過去記持
kuè-khì kì-tî
親像是昨暝
tshin-tshiūnn sī tsa-mî
雖然是伊的過去
sui-jiân sī i ê kuè-khì
我聽了真有趣味
guá thiann-liáu tsin ū tshù-bī
我欲唱一條歌
guá beh tshiùnn tsi̍t-tiâu kua
來送予伊
lâi sàng hōo i
人講阿爸親像山
lâng kóng a-pah tshin-tshiūnn suann
山的形像伊的影
suann ê hîng tshiūnn i ê iánn
自阮細漢共我晟
tsū gún sè-hàn kā guá tshiânn
艱苦攏無講出聲
kan-khóo lóng bô kóng tshut-siann
人講阿爸親像山
lâng kóng a-pah tshin-tshiūnn suann
天地也是伊的名
thinn-tē iā-sī i ê miâ
伊講年歲無算啥
i kóng nî-huè bô-sǹg siánn
我永遠攏是伊的囝
guá íng-uán lóng-sī i ê kiánn
伊對阮的關心
i tuì gún ê kuan-sim
我心內攏知影
guá sim-lāi lóng tsai-iánn
毋捌對你講感謝
m̄-bat tuì lí kóng kám-siā
用唱歌
iōng tshiùnn-kua
來講阮的心聲
lâi kóng gún ê sim-siann
