放輕鬆
《放輕鬆》Pàng Khin-sang
黃鳳儀N̂g Hōng-gî
——————————————
拖著沉重的跤步
thua tio̍h tîm-tāng ê kha-pōo
又磨過了一工
iū buâ kuè-liáu tsi̍t-kang
帶著靡靡的心情
tài tio̍h bí-bí ê sim-tsîng
倚佇拍開的窗
uá tī phah-khui ê thang
喘一口氣
tshuán tsi̍t-kháu-khuì
這敢是生活
tse kám-sī sing-ua̍h
電視的無聊節目
tiān-sī ê bô-liâu tsiat-bo̍k
看袂煞的電影
khuànn buē-suah ê tiān-iánn
現實代替了願望
hiān-si̍t tāi-thè liáu guān-bāng
只好來佇遮
tsí-hó lâi tshāi tī tsia
想欲走揣一个界限
siūnn-beh tsáu-tshuē tsi̍t-ê kài-hān
去感受
khì kám-siū
世界遐爾開闊
sè-kài hiah-nī khui-khuah
遐爾仔倚
hiah-nī-á uá
請你放輕鬆
tshiánn lí pàng khin-sang
請你心情放輕鬆
tshiánn lí sim-tsîng pàng khin-sang
人生毋好予時間催咧行
jîn-sing móo hōo sî-kan tshui teh kiânn
平凡的生活
pîng-huân ê sing-ua̍h
也有不平凡的形影
iā ū put-pîng-huân ê hîng-iánn
請你放輕鬆
tshiánn lí pàng khin-sang
請你心情放輕鬆
tshiánn lí sim-tsîng pàng khin-sang
小可歇睏
sió-khuá hioh-khùn
咱閣再起行
lán koh-tsài khí-kiânn
等待頭前的風景是啥
tán-thāi thâu-tsîng ê hong-kíng sī siánn
勇敢行落去
ióng-kám kiânn–lo̍h-khì
就會知影
tiō ē tsai-iánn
