人生親像車站
《人生親像車站》Jîn-sing Tshin-tshiūnn Tshia-tsām
曾心梅Tsan Sim-muî
——————————————
願意付出的人
guān-ì hù-tshut ê lâng
永遠知影疼惜世間
íng-uán tsai-iánn thiànn-sioh sè-kan
因為一粒善良的心
in-uī tsi̍t-lia̍p siān-liông ê sim
會一直陪伴跤步行
ē it-ti̍t puê-phuānn kha-pōo kiânn
願意分享的人
guān-ì hun-hióng ê lâng
送人笑容
sàng lâng tshiò-iông
滿身的芳
máu-sin ê phang
因為分出去的感動
in-uī pun–tshut-khì ê kám-tōng
會一直歡喜真濟人
ē it-ti̍t huann-hí tsin tsuē lâng
踮心內的土地
tiàm sim-lāi ê thóo-tē
種出一蕊一蕊花
tsióng tshut tsi̍t-luí-tsi̍t-luí hue
佇天頂的風吹
tī thinn-tíng ê hong-tshue
斷線嘛著繼續飛
tn̄g-suànn mā tio̍h kè-sio̍k pue
心疼別人的遭遇
sim-thiànn pa̍t-lâng ê tso-gū
提出家己的本事
thê-tshut ka-kī ê pún-sū
愛
ài
是你我上媠的厝
sī lí guá siōng suí ê tshù
人生親像車站
jîn-sing tshin-tshiūnn tshia-tsām
一人一人閣一人
tsi̍t-lâng tsi̍t-lâng koh tsi̍t-lâng
若相依相倚
nā sio i sio-uá
就有溫暖
tiō ū un-luán
—
心疼別人的傷痕
sim-thiànn pa̍t-lâng ê siong-hûn
感恩家己的安穩
kám-un ka-kī ê an-ún
愛
ài
是世間上闊的田園
sī sè-kan siōng khuah ê tshân-hn̂g
人生親像車站
jîn-sing tshin-tshiūnn tshia-tsām
一站一站過一站
tsi̍t-tsām tsi̍t-tsām kuè tsi̍t-tsām
來去偌濟人
lâi-khì guā-tsuē lâng
才看著圓滿
tsiah khuànn-tio̍h uân-buán
你是我的車站
lí sī guá ê tshia-tsām
一暗一暗閣一暗
tsi̍t-àm tsi̍t-àm koh tsi̍t-àm
毋管偌濟困難
m̄-kuán guā-tsuē khùn-lân
有我做伴
ū guá tsuè-phuānn
永遠
íng-uán
