新娘衫
《新娘衫》Sin-niû-sann
蘇路Soo Lōo(蘇宥蓉Soo Iū-iông)
——————————————
昨暝是最後一夜
tsa-mî sī tsuè-āu tsi̍t-iā
我一个人的生活
guá tsi̍t-ê-lâng ê sing-ua̍h
這領白色的新娘衫
tsit niá pe̍h-sik ê sin-niû-sann
予阮的心揣著岸
hōo gún ê sim tshuē-tio̍h huānn
我知影你踮門外
guá tsai-iánn lí tiàm mn̂g-guā
佮幸福做陣等我
kah hīng-hok tsuè-tīn tán guá
禮堂內快樂的歌聲
lé-tn̂g lāi khuài-lo̍k ê kua-siann
你是阮今生的伴
lí sī gún kim-sing ê phuānn
美麗的一領
bí-lē ê tsi̍t-niá
白色新娘衫
pe̍h-sik sin-niû-sann
阮就欲嫁予你啦
gún tiō beh kè hōo lí–lah
你是阮感情
lí sī gún kám-tsîng
唯一的靠山
uî-it ê khò-suann
好䆀阮攏綴你行
hó-bái gún lóng tuè lí kiânn
美麗的一領
bí-lē ê tsi̍t-niá
白色新娘衫
pe̍h-sik sin-niû-sann
開始咱新的生活
khai-sí lán sin ê sing-ua̍h
無論是
bô-lūn sī
天崩地裂的變化
thinn pang tē li̍h ê piàn-huà
阮永遠是你的伴
gún íng-uán sī lí ê phuānn
禮堂外陣陣歌聲
lé-tn̂g guā tsūn-tsūn kua-siann
是祝福著你佮我
sī tsiok-hok tio̍h lí kah guá
牽著你的手
khan-tio̍h lí ê tshiú
做陣行
tsuè-tīn kiânn
我愛你
guá ài lí
你愛我
lí ài guá
