痴情的等待
《痴情的等待》Tshi-tsîng ê Tán-thāi
蘇宥蓉Soo Iū-iông(蘇路Soo Lōo)
——————————————
碼頭邊
bé-thâu pinn
我佮你來熟似
guá kah lí lâi si̍k-sāi
也是咱來分開的所在
iā-sī lán lâi hun-khui ê sóo-tsāi
如今你心內
jû-kim lí sim-lāi
早無阮的存在
tsá bô gún ê tsûn-tsāi
誰知阮
siáng tsai gún
會愛甲遮悲哀
ē ài kah tsia pi-ai
一跤皮箱
tsi̍t-kha phuê-siunn
滿滿的傷害
muá-muá ê siong-hāi
一杯苦酒
tsi̍t-pue khóo-tsiú
滿滿的目屎
muá-muá ê ba̍k-sái
失戀的滋味
sit-luân ê tsu-bī
連酒也無路來
liân tsiú iā bô-lōo-lâi
酒袂當解心疼的悲哀
tsiú buē-tàng kái sim thiànn ê pi-ai
苦酒一杯閣一杯
khóo-tsiú tsi̍t-pue koh tsi̍t-pue
斟落來
thîn–lo̍h-lâi
你的愛情把戲
lí ê ài-tsîng pá-hì
我已經知
guá í-king tsai
我無奈啊無奈
guá bô-nāi–ah bô-nāi
對你痴情的等待
tuì lí tshi-tsîng ê tán-thāi
害自己每日吼三擺
hāi tsū-kí muí-ji̍t háu sann-pái
醉茫茫踮這个酒場內
tsuì-bâng-bâng tiàm tsit-ê tsiú-tiûnn lāi
予寂寞來陪我坐吧臺
hōo tsi̍k-bo̍k lâi puê guá tsē pa-tâi
我無恨你變心也攏無予我知
guá bô hūn lí piàn-sim iā lóng bô hōo guá tsai
這杯酒
tsit pue tsiú
害我閣醉三擺
hāi guá koh tsuì sann-pái
