咱彰化
《咱彰化》Lân Tsiong-huà
——————————————
彰化舊名叫半線
Tsiong-huà kū-miâ kiò Puànn-suànn
有山有水
ū suann ū tsuí
人文雅
lâng bûn-ngá
一府二鹿三艋舺
it hú jī lo̍k sann báng-kah
古早到今有名聲
kóo-tsá kàu-tann ū miâ-siann
南來北往
lâm-lâi pak-óng
山海線
suann- hái-suànn
攏愛經過咱彰化
lóng ài king-kuè lán Tsiong-huà
八卦山頂有大佛
Pat-kuà-suann tíng ū Tuā-hu̍t
濁水溪邊好田園
Lô-tsuí-khe pinn hó tshân-hn̂g
鹿港字畫滿市街
Lo̍k-káng jī-uē muá tshī-ke
和美書院好讀冊
Hô-bí su-īnn hó tha̍k-tsheh
扇形車庫
siàn-hîng tshia-khòo
玻璃廟
po-lê biō
獨一無二
to̍k-it-bô-jī
咱愛寶惜
lán ài pó-sioh
溪湖葡萄甜粅粅
Khe-ôo phû-thô tinn-but-but
花壇茉莉芳芳芳
Hue-tuânn ba̍k-nī pha̋ng-phang-phang
二林柳丁圓滾滾
Jī-lîm liú-ting înn kùn-kùn
大城西瓜紅紅紅
Tuā-sîng si-kue a̋ng-âng âng
溪州菝仔脆脆脆
Khe-tsiu pua̍t-á tshè-tshè-tshè
田尾花蕊媠噹噹
Tshân-bué hue-luí suí-tang-tang
復興牛奶芳貢貢
Ho̍k-hing gû-ling phang-kòng-kòng
芬園米粉???
Hun-hn̂g bí-hún khiű-khiū-khiū
埤頭豬仔肥朒朒
Pi-thâu ti-á puî-tsut-tsut
王功蚵仔鮮鮮鮮
Ông-king ô-á tshi̋nn-tshinn-tshinn
線西海產活跳跳
Suànn-sai hái-sán ua̍h-thiàu-thiàu
伸港有名是蒜頭
Sin-káng ū-miâ sī suàn-thâu
物產豐富人欣羨
bu̍t-sán hong-hù lâng him-siān
男女老幼攏安然
lâm-lú nóo-iù lóng an-jiân
百姓樸實真拍拚
peh-sènn phoh-si̍t tsin phah-piànn
企業成功占頭名
khì-gia̍p sîng-kong tsiàm thâu-miâ
鞋仔襪仔跤踏車
ê-á bue̍h-á kha-ta̍h-tshia
世界第一上時行
sè-kài tē-it siōng sî-kiânn
本土語言主流化
pún-thóo gí-giân tsú-liû-huà
祖先文化咱來湠
tsóo-sian bûn-huà lán lâi thuànn
士農工商齊仝心
sū-lông kang-siong tsiâu kāng-sim
母語保存咱責任
bó-gí pó-tsûn lán tsik-jīm
眾人牽手向前行
tsìng-lâng khan-tshiú hiòng-tsiân kiânn
國際發光好名聲
kok-tsè huat-kng hó miâ-siann
欸~咱彰化
eh~ lán Tsiong-huà
