轉故鄉
《轉故鄉》Tńg Kòo-hiong
張金挺Tiunn Kim-thíng(廈門)
——————————————
微風對海彼爿
bî-hong tuì hái hit-pîng
一陣一陣吹過來
tsi̍t-tsūn-tsi̍t-tsūn tshe–kuè-lâi
我想起我的故鄉
guá siūnn-khí guá ê kòo-hiong
故鄉啊故鄉
kòo-hiong–ah kòo-hiong
田園一坵連一坵
tshân-hn̂g tsi̍t-khu liân tsi̍t-khu
彎彎的小路
uan-uan ê sió-lōo
迵到紅磚古厝
thàng kah âng-tsng kóo-tshù
日頭對山頂
ji̍t-thâu tuì suann-tíng
照著大片大片
tsiò tio̍h tuā-phìnn-tuā-phìnn
相思樹林
siunn-si-tshiū-nâ
我想起我的故鄉
guá siūnn-khí guá ê kòo-hiong
故鄉啊故鄉
kòo-hiong–ah kòo-hiong
滿山樹葉
muá-suann tshiū-hio̍h
翠翠綠綠
tshuì-tshuì-li̍k-li̍k
暝日數念的親人
mî-ji̍t siàu-liām ê tshin-lâng
歇佇咧彼个山頭
hioh tī-leh hit ê suann-thâu
轉去啊轉去啊
tńg–khì ah tńg–khì ah
轉去啊轉去啊
tńg–khì ah tńg–khì ah
轉去紅磚古厝
tńg-khì âng-tsng kóo-tshù
緊轉去爸母的身邊
kín tńg-khì pē-bú ê sin-pinn
轉去啊轉去啊
tńg–khì ah tńg–khì ah
轉去啊轉去啊
tńg–khì ah tńg–khì ah
轉去紅磚古厝
tńg-khì âng-tsng kóo-tshù
緊轉去爸母的身邊
kín tńg-khì pē-bú ê sin-pinn
