石獅的精彩
《石獅的精彩》Tsio̍h-sai ê Tsing-tshái
洪及響Âng Ki̍p-hióng(泉州)
——————————————
阮踮佇石獅
gún tiàm tī Tsio̍h-sai
已經幾若年
í-king kuí-lō nî
這搭有我瑪摺的
tsit tah ū guá má-tsih–ê
朋友佮好厝邊
pîng-iú kah hó tshù-pinn
定定聽怹咧講
tiānn-tiānn thiann in leh kóng
姑嫂塔的傳奇
Koo-só-thah ê tuān-kî
這種的愛情故事
tsit tsióng ê ài-tsîng kòo-sū
予我目屎流袂離
hōo guá ba̍k-sái lâu buē-lī
我離開石獅
guá lī-khui Tsio̍h-sai
已經幾若年
í-king kuí-lō nî
彼搭有我懷念的
hit tah ū guá huâi-liām ê
肉粽佮牛肉羹
bah-tsàng kah bû-hia̍k-kinn
定定托怹帶去
tiānn-tiānn thok in tuà khì
新大侖的菜市
Sin-tuā-lûn ê tshài-tshī
彼種的街邊小食
hit tsióng ê kue-pinn sió-tsia̍h
予我喙瀾tshām-tshām 滴
hōo guá tshuì-nuā tshām-tshām tih
石獅是一个
Tsio̍h-sai sī tsi̍t-ê
迷人的城市
bê-lâng ê siânn-tshī
徛佇黃金海岸邊
khiā tī N̂g-kim-hái-huānn pinn
看見媽祖咧共咱保庇
khuànn-kìnn Má-tsóo leh kā lán pó-pì
石湖港的海風
Tsio̍h-ôo-káng ê hái-hong
吹起我的相思
tshue khí guá ê siong-si
予我想起故鄉的你
hōo guá siūnn-khí kòo-hiong ê lí
石獅是一个
Tsio̍h-sai sī tsi̍t-ê
拍拚的所在
phah-piànn ê sóo-tsāi
行佇永甯古街內
kiânn tī Íng-lîng kóo-kue lāi
看見歷史留予咱記載
khuànn-kìnn li̍k-sí lâu hōo lán kì-tsài
服裝城的人流
Ho̍k-tsong-siânn ê jîn-liû
沖走我的疲態
tshiong tsáu guá ê phî-thài
予我揣著現在的愛
hōo guá tshē-tio̍h hiān tsāi ê ài
—
石獅
Tsio̍h-sai
我毋敢對你講Bye-bye
guá m̄-kánn tuì lí kóng Bye-bye
石獅
Tsio̍h-sai
我一定會閣再轉來
guá it-tīng ē koh-tsài tńg–lâi
石獅
Tsio̍h-sai
我毋敢對你講Bye-bye
guá m̄-kánn tuì lí kóng Bye-bye
石獅
Tsio̍h-sai
我會閣再轉來
guá ē koh-tsài tńg–lâi
石獅石獅
Tsio̍h-sai Tsio̍h-sai
我會揣著我的精彩
guá ē tshē-tio̍h guá ê tsing-tshái
