天公花
《天公花》Thinn-kong-hue
張涵雅Tiunn Hâm-ngá
——————————————
天公花媠
thinn-kong-hue suí
媽媽講是世間
má-mah kóng sī sè-kan
上媠的花蕊
siōng suí ê hue-luí
天公花開
thinn-kong-hue khui
天公有疼痛的人
thinn-kong ū thiànn-thàng ê lâng
才會看見
tsiah ē khuànn–kìnn
天公花芳
thinn-kong-hue phang
敢是記憶中
kám-sī kì-ik tiong
才會慢慢鼻著
tsiah ē bān-bān phīnn–tio̍h
天公花蕊
thinn-kong-hue-luí
若是風雨暝了後
nā-sī hong-hōo mî liáu-āu
才恬恬開
tsiah tiām-tiām khui
細漢眠床講古的時
sè-hàn bîn-tshn̂g kóng-kóo ê sî
幸福的阮
hīng-hok ê gún
哪會攏聽攏無
ná ē lóng thiann lóng bô
伊笑文文
i tshiò bûn-bûn
看阮的目睭
khuànn gún ê ba̍k-tsiu
親像窗外
tshin-tshiūnn thang-guā
光光甜甜的月娘
kng-kng tinn-tinn ê gue̍h-niû
一工阮嘛行過青春啦
tsi̍t-kang gún mā kiânn kuè tshing-tshun–lah
阮嘛失去少年啦
gún mā sit-khì siàu-liân–lah
毋知天公花開佇佗位
m̄-tsai thinn-kong-hue khui tī tó-uī
一工媽媽無佇身邊啦
tsi̍t-kang má-mah bô tī sin-pinn–lah
思念變成月暝啦
su-liām piàn-sîng gue̍h-mî–lah
敢是心內開著一蕊
kám-sī sim-lāi khui tio̍h tsi̍t-luí
天公花
thinn-kong-hue
—
阮嘛行過青春啦
gún mā kiânn kuè tshing-tshun–lah
阮嘛失去少年啦
gún mā sit-khì siàu-liân–lah
毋知天公花開佇佗位
m̄-tsai thinn-kong-hue khui tī tó-uī
一工媽媽無佇身邊啦
tsi̍t-kang má-mah bô tī sin-pinn–lah
思念變成月暝啦
su-liām piàn-sîng gue̍h mî–lah
敢是心內開著一蕊
kám-sī sim-lāi khui tio̍h tsi̍t-luí
才知影
tsiah tsai-iánn
心內開著一蕊
sim-lāi khui tio̍h tsi̍t-luí
天公花
thinn-kong-hue
