寶島奇譚
《寶島奇譚》Pó-tó Kî-thâm
黃秋田N̂g Tshiu-tiân
——————————————
蓬萊寶島哩是臺灣
hông-lâi pó-tó–lih sī Tâi-uân
安居樂業喔真平安啊欸
an-ki lo̍k-gia̍p–ooh tsin pîng-an–ah-eh
四季名產真濟項
sù-kuì bîng-sán tsin tsuē hāng
士農工商免操煩啊欸
sū-lông kong-siong bián tshau-huân–ah-eh
有閒咱就罔來啖
ū-îng lán tiō bóng lâi tām
講起寶島的奇譚啊欸
kóng-khí pó-tó ê kî-thâm–ah-eh
攏是事實無亂講
lóng-sī sū-si̍t bô luān-káng
故事來流傳啊在世間啊欸
kòo-sū lâi liû-thuân–ah tsāi sè-kan–ah-eh
一府二鹿三艋舺
it hú jī lo̍k sann báng-kah
臺灣錢銀是淹到跤
Tâi-uân tsînn-gîn sī im kàu kha
唐山來臺啊真熁搭
Tn̂g-suann lâi Tâi–ah tsin hannh-tah
希望白手來早成家啊哩
hi-bāng pe̍h-tshiú lâi tsá sîng-ka–ah-lih
咿~ ih~
金銀財寶人人愛
kim-gîn tsâi-pó lâng-lâng ài
大家拍拚喔想發財啊欸
tāi-ke phah-piànn–ooh siūnn huat-tsâi–ah-eh
愛錢咱莫做虧心代
ài tsînn lán mài tsò khui-sim tāi
若無報應喔隨時來啊欸
nā-bô pò-ìng–ooh suî-sî lâi–ah-eh
周成故事人人知
Tsiu Sîng kòo-sū lâng-lâng tsai
暗戀郭仔麵喔將某共害啊欸
àm luân Kueh-á Mī–ooh tsiong bóo kā hāi–ah-eh
官府嚴辦將伊刣
kuann-hú giâm-pān tsiong i thâi
反悔莫及來真悲哀哩
huán-hué bo̍k-ki̍p–lâi tsin pi-ai–lih
咿~ ih~
臺南奇案林投姊
Tâi-lâm kî-àn Nâ-tâu-tsí
貪財郎君害死伊啊欸
tham-tsâi lông-kun hāi-sí i–ah-eh
冤魂追到汕頭去
uan-hûn tui kah Suànn-thâu khì
活活捏死喔周仔司啊欸
ua̍h-ua̍h tēnn–sí ooh Tsiu-á Si–ah-eh
人人做好哩才應該
lâng-lâng tsuè-hó–lih tsiah ing-kai
阿公仔開店做好代
A-kong-á khui-tiàm tsò hó-tāi
世間呵咾是通人知
sè-kan o-ló sī thong-lâng tsai
阿公店是對遮喔傳落來啊欸
A-kong-tiàm sī tuì tsia–ooh thuân–lo̍h-lâi ah-eh
勸咱安份佮守己
khǹg lán an-hūn kah siú-kí
不義的錢財喔毋通挃啊欸
put-gī ê tsînn-tsâi–ooh m̄-thang ti̍h–ah-eh
積善積德重仁義
tsik-siān tsik-tik tiōng jîn-gī
一生幸福來過日子哩
it-sing hīng-hok lâi kè ji̍t-tsí–lih
咿~ ih
