搭車歌
《搭車歌》Tah-tshia Kua
賴謙祺Luā Khiam-kî
——————————————
臺北搭車漸漸歇
Tâi-pak tah-tshia tsiām-tsiām hioh
攑頭看見鶯歌石
gia̍h-thâu khuànn-kìnn Ing-ko-tsio̍h
坐在車內一直搖
tsē tsāi tshia-lāi it-ti̍t iô
干焦愛人仔看袂著
kan-tann ài-jîn-á khuànn buē-tio̍h
鶯歌過了到桃園
Ing-ko kè-liáu kàu Thô-hn̂g
附近全是客人庄
hū-kūn tsuân sī Kheh-lâng-tsng
離開故鄉心頭酸
lī-khui kòo-hiong sim-thâu sng
離別愛人仔割心腸
lî-pia̍t ài-jîn-á kuah sim-tn̂g
桃園閣去到臺中
Thô-hn̂g koh khì kàu Tâi-tiong
窗外風景真明朗
thang-guā hong-kíng tsin bîng-lóng
想起愛人仔伊笑容
siūnn-khí ài-jîn-á i tshiò-iông
思念經過意難忘
su-liām king-kè ì lân-bōng
臺中開車到彰化
Tâi-tiong khui-tshia kàu Tsiong-huà
大佛鎮在八卦山
tuā-hu̍t tìn tsāi Pat-kuà-suann
大佛像阮守孤單
tuā-hu̍t tshiūnn gún siú koo-tuann
一定了解阮心肝
it-tīng liáu-kái gún sim-kuann
彰化嘉義過了後
Tsiong-huà Ka-gī kè liáu-āu
古都臺南已經到
kóo-too Tâi-lâm í-king kàu
心內一時亂操操
sim-lāi tsi̍t-sî luān-tshau-tshau
何時佮君仔會透老
hô-sî kah kun–á ē thàu-lāu
臺南坐到高雄港
Tâi-lâm tsē kàu Ko-hiông-káng
綴人落車心茫茫
tè lâng lo̍h-tshia sim bâng-bâng
今日雙人分西東
kim-ji̍t siang-lâng hun se-tang
日後望娘仔相疼痛
ji̍t-āu bāng niû-á sio thiànn-thàng
