稻草人
《稻草人》Tiū-tsháu-lâng
鄭進一 Tēnn Tsìn-it
——————————————
田岸徛一仙稻草人
tshân-huānn khiā tsi̍t-sian tiū-tsháu-lâng
袂振閣袂動
buē tín koh buē tāng
袂吵袂鬧袂停工
buē tshá buē nāu buē thîng-kang
一領破衫穿規冬
tsi̍t-niá phuà-sann tshīng kui tang
一隻粟鳥仔看甲愣愣
tsi̍t-tsiah tshik-tsiáu-á khuànn kah gāng-gāng
踮身邊飛咧飛咧
tiàm sin-pinn pue–leh pue–leh
想空想縫
siūnn-khang-siūnn-phāng
田內稻仔
tshân-lāi tiū-á
飽穗閣芳
pá-suī koh phang
伊想欲偷食
i siūnn-beh thau-tsia̍h
毋知敢通
m̄-tsai kám thang
毋知已經過了偌濟時間
m̄-tsai í-king kuè-liáu guā-tsē sî-kan
鳥仔枵甲頭眩目暗
tsiáu-á iau kah thâu-hîn-ba̍k-àm
稻草人猶原無振動
tiū-tsháu-lâng iu-guân bô tín-tāng
這時陣鳥仔才知
tsit sî-tsūn tsiáu-á tsiah tsai
這見已經無望
tsit kiàn í-king bô-bāng
去踢著鐵枋
khì that tio̍h thih-pang
田岸徛一仙稻草人
tshân-huānn khiā tsi̍t-sian tiū-tsháu-lâng
無跤也無手
bô kha iā bô tshiú
無耳無鼻無目睭
bô hīnn bô phīnn bô ba̍k-tsiu
規年迵天無公休
kui-nî-thàng-thinn bô kong-hiu
一陣風雨無意無思
tsi̍t-tsūn hong-hōo bô-ì-bô-sù
七月半落啊落啊
tshit-gue̍h-puànn lo̍h–ah lo̍h–ah
落到中秋
lo̍h kàu tiong-tshiu
無人關心伊的身軀
bô-lâng kuan-sim i ê sin-khu
無人聽伊哼甲半句
bô-lâng thiann i hainn kah puànn-kù
踮在這个世間無朋無友
tiàm-tsāi tsit-ê sè-kan bô-pîng-bô-iú
出世又閣無爸無母
tshut-sì iū-koh bô-pē-bô-bú
稻草人只有一个心事
tiū-tsháu-lâng tsí-ū tsi̍t-ê sim-sū
是愛閣徛偌久
sī ài-koh khiā guā kú
才會得著自由
tsiah-ē tit-tio̍h tsū-iû
放伊干休
pàng i kan-hiu
