思故鄉
《思故鄉》Su Kòo-hiong
鄭日清Tēnn Ji̍t-tshing
——————————————
記著賞花草埔頂
kì tio̍h siúnn-hue tsháu-poo tíng
日頭快落山
ji̍t-thâu khuài lo̍h-suann
相楗肩頭做伙行
sio-kīng king-thâu tsuè-hué kiânn
遮大陣的伴
tsiah tuā-tīn ê phuānn
大家相招欲轉去
tāi-ke sio-tsio beh tńg–khì
沿路那唱歌
iân-lōo ná tshiùnn-kua
細漢的時陣
suè-hàn ê sî-tsūn
朋友兄弟遮大拖
pîng-iú hiann-tī tsiah tuā-thua
啊~故鄉的情景
ah~ kòo-hiong ê tsîng-kíng
掛在我的心肝
kuà tsāi guá ê sim-kuann
想著一个親大姊
siūnn-tio̍h tsi̍t-ê tshin tuā-tsí
欲出嫁以前
beh tshut-kè í-tsîng
家己一个來岸頂
ka-kī tsi̍t-ê lâi huānn-tíng
心肝冷清清
sim-kuann líng-tshing-tshing
流了悲喜的目屎
lâu liáu pi-hí ê ba̍k-sái
滴甲滿胸前
tih kah muá hing-tsîng
細漢的時陣
suè-hàn ê sî-tsūn
朋友兄弟遮大拖
pîng-iú hiann-tī tsiah tuā-thua
啊~故鄉的情景
ah~ kòo-hiong ê tsîng-kíng
親像在阮目前
tshin-tshiūnn tsāi gún ba̍k-tsîng
徛起鬧熱的城市
khī-khí lāu-jia̍t ê siânn-tshī
拄著落雨暝
tú-tio̍h lo̍h-hōo mî
規暗目屎沓沓滴
kui-àm ba̍k-sái ta̍p-ta̍p-tih
出外心傷悲
tshut-guā sim siong-pi
聽見有人叫阮醒
thiann-kìnn ū-lâng kiò gún tshínn
夢中起驚疑
bāng-tiong khí kiann-gî
細漢的時陣朋友
suè-hàn ê sî-tsūn pîng-iú
兄弟在身邊
hiann-tī tsāi sin-pinn
啊~想起著故鄉
ah~ siūnn-khí tio̍h kòo-hiong
袂睏捙盤規暝
buē-khùn tshia-puânn kui-mî
