南國情歌
《南國情歌》Lâm-kok Tsîng-kua
鄭日清Tēnn Ji̍t-tshing
——————————————
南國星夜清風吹
lâm-kok sing-iā tshing-hong tshue
只有是
tsí-ū sī
只有是你我兩个
tsí-ū sī lí guá nn̄g-ê
欣賞天星的美麗
him-sióng thinn-tshinn ê bí-lē
踮在椰子樹跤
tiàm-tsāi iâ-tsí-tshiū ē
幽雅的情緒
iu-ngá ê tsîng-sī
句句的情話
kù-kù ê tsîng-uē
毋知著時間經過
m̄-tsai tio̍h sî-kan king-kuè
遠遠歌聲引心迷
hn̄g-hn̄g kua-siann ín sim bê
配合咱相會
phuè-ha̍p lán siong-huē
南國月色溫柔味
lâm-kok ge̍h-sik un-jiû bī
包圍著
pau-uî tio̍h
包圍著你我身邊
pau-uî tio̍h lí guá sin-pinn
趁著青春的歡喜
thàn tio̍h tshing-tshun ê huann-hí
踮在深夜海墘
tiàm-tsāi tshim-iā hái-kînn
輕鬆的水聲
khin-sang ê tsuí-siann
沉沉的空氣
tîm-tîm ê khong-khì
挽著阮毋願分離
bán tio̍h gún m̄-guān hun-lî
津津有味露水滴
tin-tin iú-bī lōo-tsuí tih
加添咱熱意
ka-thiam lán jia̍t-ì
南國情歌引心茫
lâm-kok tsîng-kua ín sim bâng
迷醉著
bê-tsuì tio̍h
迷醉著你我兩人
bê-tsuì tio̍h lí guá nn̄g-lâng
說出熱情的希望
sueh-tshut jia̍t-tsîng ê hi-bāng
踮在可愛樓窗
tiàm-tsāi khó-ài lâu-thang
微妙的情調
bî-miāu ê tsîng-tiāu
綿綿的情網
mî-mî ê tsîng-bāng
表示著情深意重
piáu-sī tio̍h tsîng tshim ì tāng
微微春風對面送
bî-bî tshun-hong tuì-bīn sàng
搖動戀心欉
iô-tāng luân-sim tsâng
