薑母鴨
《薑母鴨》Kiunn-bó-ah
蔡義德Tshuà Gī-tik
——————————————
日頭欲落山
ji̍t-thâu beh lo̍h-suann
海面天邊紅冇冇
hái-bīn thinn-pinn âng phànn-phànn
白雲罵彩霞
pe̍h-hûn mā tshái-hâ
逐工換新衫
ta̍k-kang uānn sin-sann
鳥仔撇懸懸
tsiáu-á phiat kuân-kuân
毋驚交通的開紅單
m̄-kiann kau-thong–ê khui âng-tuann
路燈氣掣掣
lōo-ting khì tshuah-tshuah
也欲照路
iā beh tsiò-lōo
也欲罰徛
iā beh hua̍t-khiā
日頭拄落山
ji̍t-thâu tú lo̍h-suann
四面八方烏嘛嘛
sì-bīn pat-hong oo mà-mà
風雨上好膽
hong-hōo siōng hó-tánn
下暗閣請假
e-àm koh tshíng-ká
月娘睏無飽
gue̍h-niû khùn bô pá
膨粉胭脂一直抹
phòng-hún ian-tsi it-ti̍t buah
天星上認命
thinn-tshinn siōng jīn-miā
也那排隊
iā ná pâi-tuī
也那點名
iā ná tiám-miâ
巷仔口一擔薑母鴨
hāng-á-kháu tsi̍t-tànn kiunn-bú-ah
規暗人攏插插插
kui àm lâng lóng tshah-tshah-tshah
欲食通血去風寒
beh tsia̍h thong-hiat khì-hong-kuânn
阮對做囡仔就食甲大
gún tuì tsuè-gín-á tō tsia̍h kah tuā
下暗欲來去予人請
e-àm beh lâi-khì hōo-lâng tshiánn
有人出錢就食免驚
ū-lâng tshut tsînn tiō tsia̍h bián-kiann
補陰補陽兼補肝
póo-im póo-iông kiam póo-kuann
固元固本固身命
kòo-guân kòo-pún kòo sin-miā
有食閣有掠
ū tsia̍h koh ū lia̍h
鼎底包轉來做宵夜
tiánn-té pau tńg-lâi tsuè siau-iā
一半予阿爸
tsi̍t-puànn hōo a-pah
一半飼阿娘
tsi̍t-puànn tshī a-niâ
食著薑母鴨
tsia̍h tio̍h kiunn-bú-ah
冬天免蓋被嘛會流汗
tang-thinn bián kah-phuē mā ē lâu-kuānn
若欲問感覺
nā beh mn̄g kám-kak
實在溫暖
si̍t-tsāi un-luán
實在真正好食
si̍t-tsāi tsin-tsiànn hó-tsia̍h
