食宵夜
《食宵夜》Tsia̍h Siau-iā
澎恰恰Pōng Tshia̍h Tshia̍h
——————————————
現實社會真無情
hiān-si̍t siā-huē tsin bô-tsîng
予人感覺心頭冷
hōo-lâng kám-kak sim-thâu líng
日時駛車開大燈
ji̍t–sî sái-tshia khui tuā-ting
暗時驚人揤電鈴
àm-sî kiann-lâng tshi̍h tiān-lîng
實在做人愛端正
si̍t-tsāi tsuè-lâng ài tuan-tsiānn
你我互相來做伴
lí guá hōo-siong lâi tsuè-phuānn
日時公平來競爭
ji̍t–sî kong-pênn lâi kīng-tsing
暗時歡喜來相請
àm-sî huann-hí lâi sio-tshiánn
招朋友
tsio pîng-iú
揣酒伴
tshuē tsiú-phuānn
逐家來去食宵夜
ta̍k-ke lâi-khì tsia̍h siau-iā
錢愛趁
tsînn ài thàn
飯嘛愛食
pn̄g mā ài tsia̍h
人生在世夢一般
jîn-sing tsāi-sè bāng it-puann
人咧做
lâng teh tsuè
天有咧看
thinn ū teh khuànn
毋免講彼號五四三
m̄-bián kóng hit-lō gōo-sì-sann
食予燒燒
tsia̍h hōo sio-sio
睏予飽飽
khùn hōo pá-pá
明仔載
bîn-á-tsài
才閣來繼續行
tsiah-koh lâi kè-sio̍k kiânn
