紅薔薇
《紅薔薇》Âng Tshiûnn-bî
石易巧Tsio̍h Ī-khá
——————————————
紅薔薇啊紅薔薇
âng tshiûnn-bî–ah âng tshiûnn-bî
微微春風搖花枝
bî-bî tshun-hong iô hue-ki
花枝就是伊歌語
hue-ki tsiū-sī i kua-gí
歌語開花紅薔薇
kua-gí khui-hue âng tshiûnn-bî
紅薔薇啊紅薔薇
âng tshiûnn-bî–ah âng tshiûnn-bî
溫暖日頭惜花蕊
un-luán ji̍t-thâu sioh hue-luí
花蕊就是伊情詩
hue-luí tsiū-sī i tsîng-si
情詩留芳紅薔薇
tsîng-si lâu phang âng tshiûnn-bî
紅薔薇啊紅薔薇
âng tshiûnn-bî–ah âng tshiûnn-bî
美麗蝴蝶想花蜜
bí-lē ôo-tia̍p siūnn hue-bi̍t
花蜜就是伊愛心
hue-bi̍t tsiū-sī i ài-sim
愛心甘甜紅薔薇
ài-sim kam-tinn âng tshiûnn-bî
