相逢等何時
《相逢等何時》Siong-hông Tán Hô-sî
郭素梅Kueh Sòo-muî
——————————————
黃昏日頭已經墜落西
hông-hun ji̍t-thâu í-king tuī-lo̍h sai
東爿月娘漸出來
tang-pîng ge̍h-niû tsiām tshut–lâi
公園內青年男女
kong-hn̂g-lāi tshing-liân lâm-lú
相隨排規排
sio-suî pâi kui-pâi
彼一日彼个好男兒
hit-tsi̍t-ji̍t hit ê hó lâm-jî
怎樣哪無來
tsuánn-iūnn ná bô lâi
愛伊在心內
ài i tsāi sim-lāi
想欲相見
siūnn-beh sann-kìnn
等甲月落西
tán kah ge̍h lo̍h-sai
春天若到
tshun-thinn nā kàu
草山花當開
Tsháu-suann hue tng khai
綠色樹木真正媠
li̍k-sik tshiū-bo̍k tsin-tsiànn suí
滿山嶺紅男綠女
muá suann-niá âng-lâm li̍k-lú
一對又一對
tsi̍t-tuì iū tsi̍t-tuì
彼一个英俊的男兒
hit tsi̍t-ê ing-tsùn ê lâm-jî
毋知佗位去
m̄-tsai tó-uī khì
四邊看無伊
sì-pinn khuànn-bô i
想欲相見
siūnn-beh sann-kìnn
毋知等何時
m̄-tsai tán hô-sî
玫瑰花開
muî-kuì-hue khui
芬芳真芳味
hun-hong tsin phang-bī
一陣一陣吹過去
tsi̍t-tsūn-tsi̍t-tsūn tshue–kuè-khì
親像阮青春時期
tshin-tshiūnn gún tshing-tshun sî-kî
一切心歡喜
it-tshè sim huann-hí
彼一个飄撇的男兒
hit tsi̍t-ê phiau-phiat ê lâm-jî
害阮睏袂去
hāi gún khùn buē-khì
只有思慕伊
tsí-ū su-bōo i
想欲相見
siūnn-beh sann-kìnn
何時的日子
hô-sî ê ji̍t-tsí
十七八歲
tsa̍p-tshit-pueh huè
青春最美夢
tshing-tshun tsuè bí-bāng
親像牡丹花當紅
tshin-tshiūnn bóo-tan-hue tng âng
想彼時見面
siūnn hit-sî kìnn-bīn
雙人心肝真輕鬆
siang-lâng sim-kuann tsin khin-sang
為啥物看無伊一人
uī-siánn-mih khuànn-bô i tsi̍t-lâng
大概是無望
tāi-khài sī bô-bāng
行來又行去
kiânn-lâi iū kiânn-khì
想欲相見
siūnn-beh sann-kìnn
毋知等幾冬
m̄-tsai tán kuí-tang
