拍拚向前走
《拍拚向前走》Phah-piànn Hiòng-tsiân Kiânn
玟靈Bûn-lîng
——————————————
你無愛做夢
lí bô-ài tsuè-bāng
怨嘆人生無變化
uàn-thàn jîn-sing bô piàn-huà
你想欲去拚
lí siūnn-beh khì piànn
煞行甲真驚險
suah kiânn kah tsin kiann-hiám
徛佇人生的路口
khiā tī jîn-sing ê lōo-kháu
該面對的是啥
kai bīn-tuì–ê sī siánn
想欲好額
siūnn-beh hó-gia̍h
想欲出名
siūnn-beh tshut-miâ
抑是快樂平安過生活
ia̍h-sī khuài-lo̍k pîng-an kuè sing-ua̍h
人生行到遮
jîn-sing kiânn kàu tsia
你猶佇咧考慮啥
lí iáu tī-teh khó-lū siánn
無時間煩惱
bô sî-kan huân-ló
愛繼續向前行
ài kè-sio̍k hiòng-tsiân kiânn
成功看起來
sîng-kong khuànn–khí-lâi
真簡單
tsin kán-tan
是拚死命咧活
sī piànn-sí-miā teh ua̍h
你無人巧
lí bô lâng khiáu
你無人?
lí bô lâng gâu
所以愛忍耐
sóo-í ài jím-nāi
好好拍拚
hó-hó phah-piànn
我無榮華富貴的命
guá bô îng-huâ hù-kuì ê miā
對頭拚到遮
tuì thâu piànn kàu tsia
雖然艱苦過生活
sui-jiân kan-khóo kuè sing-ua̍h
食苦當食補咧拚
tsia̍h-khóo tòng tsia̍h-póo teh piànn
我用所有氣力咧拚
guá iōng sóo-ū khuì-la̍t teh piànn
毋驚毋好額
m̄-kiann m̄ hó-gia̍h
人生自有伊的命
jîn-sing tsū ū i ê miā
咱著一工過一工
lán tio̍h tsi̍t-kang kuè tsi̍t-kang
向前行
hiòng-tsiân kiânn
