新娘衫
《新娘衫》Sin-niû-sann
王又萱Ông Iū-suan
——————————————
透早就鬧熱滾滾
thàu-tsá tiō lāu-jia̍t kún-kún
點燈結綵
tiám-ting kat-tshái
人客直直來
lâng-kheh ti̍t-ti̍t lâi
歡喜做新娘
huann-hí tsuè sin-niû
心肝嗶噗惝
sim-kuann pi̍t-po̍k-tsháinn
人生的路
jîn-sing ê lōo
重新安排
tiông-sin an-pâi
身穿著新娘衫
sin tshīng tio̍h sin-niû-sann
感謝爸母
kám-siā pē-bú
辛苦共阮晟
sin-khóo kā gún tshiânn
恁的查某囝
lín ê tsa-bóo-kiánn
今仔日
kin-á-ji̍t
欲做人娘囝
beh tsuè lâng niû-kiánn
門口陣陣炮仔聲
mn̂g-kháu tsūn-tsūn phàu-á-siann
心頭一陣痠軟疼
sim-thâu tsi̍t-tsūn sng-nńg thiànn
請恁保重啦
tshiánn lín pó-tiōng–lah
阮會帶著幸福
gún ē tuà tio̍h hīng-hok
轉來共恁看
tńg-lâi kā lín khuànn
白色的新娘衫
pe̍h-sik ê sin-niû-sann
人生彩色的感覺
jîn-sing tshái-sik ê kám-kak
未來的運命
bī-lâi ê ūn-miā
寄望這軀新娘衫
kià-bāng tsit su sin-niû-sann
