故鄉咧叫我
《故鄉咧叫我》Kòo-hiong Teh Kiò Guá
七郎Tshit-lông
——————————————
黃昏的鳥隻
hông-hun ê tsiáu-tsiah
成群飛過山
sîng-kûn pue kuè suann
引阮來
ín gún lâi
向對故鄉彼爿看
hiòng tuì kòo-hiong hit-pîng khuànn
暗風吹來
àm-hong tshue lâi
故鄉的叫聲
kòo-hiong ê kiò-siann
親像咧叫我
tshin-tshiūnn teh kiò guá
咧叫我
teh kiò guá
歲月無停的變換
suè-gua̍t bô-thîng ê piàn-uānn
只有加添我寂寞心肝
tsí-ū ka-thiam guá tsi̍k-bo̍k sim-kuann
摸著身軀的這領衫
bong tio̍h sin-khu ê tsit niá sann
想起阿母的手中線
siūnn-khí a-bú ê tshiú-tiong suànn
山盟海誓的情伴
san-bîng hái-sè ê tsîng-phuānn
這个時陣
tsit ê sî-tsūn
敢猶閣有
kám iáu-koh ū
敢猶閣有咧等我
kám iáu-koh ū teh tán guá
