欠囝的債
《欠囝的債》Khiàm Kiánn ê Tsè
唐飛Tông Hui
——————————————
望子成龍
bāng tsú sîng liông
望女成鳳
bāng lú sîng hōng
是阿母一生的願望
sī a-bú it-sing ê guān-bōng
毋甘你受風雨
m̄-kam lí siū hong-hōo
毋甘你歹命苦
m̄-kam lí pháinn-miā khóo
阿母牽恁
a-bú khan lín
行出第一步
kiânn-tshut tē-it pōo
恁是阿母的性命
lín sī a-bú ê sìnn-miā
用手遮日
iōng tshiú jia ji̍t
來予恁行
lâi hōo lín kiânn
望恁才情較奢颺
bāng lín tsâi-tsîng khah tshia-iānn
跤步著愛掠予正
kha-pōo tio̍h-ài lia̍h hōo tsiànn
千萬毋通行入烏暗城
tshian-bān m̄-thang kiânn-ji̍p oo-àm-siânn
欠囝的債
khiàm kiánn ê tsè
好歹攏愛擔
hó-pháinn lóng ài tann
菜子仔本是這款命
tshài-tsì-á pún sī tsit khuán miā
